U Biełarusi adznačyli tysiačahodździe Litvy
Ambasada Litoŭskaj Respubliki ŭ Biełarusi 18 lutaha adśviatkavała tysiaču hod imieni Litvy. Uhodki vialikaj daty, a taksama Dzień uznaŭleńnia litoŭskaj dziaržaŭnaści naładzili ŭ Biełaruskaj dziaržaŭnaj fiłarmonii. Ambasadar Litvy Edminas Bahdonas pavinšavaŭ usich prysutnych i pračytaŭ pa‑biełarusku viadomy vierš Maksima Bahdanoviča «Pahonia».
«Nas abjadnoŭvaje supolnaje histaryčnaje minułaje, supolnyja kaštoŭnaści, ahulnaje Vialikaje kniastva Litoŭskaje. I hetaja supolnaść daje biassprečnaje prava spadziavacca na toje, što ŭ nas bolš supolnaha, čym roznaha» – skazaŭ E. Bahdonas.
Na ŭračystaj viečarynie ŭ Fiłarmonii vystupili znakamityja litoŭskija vykanaŭcy pad akampaniemient Kovienskaha simfaničnaha arkiestra. Hledačy vielmi ciopła sustreli dyryžora Madestasa Pitrenasa.
Upieršyniu na scenie fiłarmonii dzieci akapelna vykanali himny Litvy i Biełarusi: Pijus Pažusis ź Litvy i Andrej Kuniec, jaki zavajavaŭ dla Biełarusi druhoje miesca na dziciačym «Jeŭrabačańni» ŭ 2006 hodzie.
Haściam śviata była pakazanaja admysłovaja stužka, jakuju padrychtavaŭ Litoŭski nacyjanalny telekanał z nahody tysiačahodździa pieršaj uzhadki imia Litvy. Kožny atrymaŭ u padarunak kampakt‑dyski ź filmam «Vilnia – kulturnaja stalica Jeŭropy», prahramu vilenskich mierapryjemstvaŭ i buklety z tłumačeńniem, što dla litoŭcaŭ značyć tysiačahodździe imia i 16 lutaha – Dzień niezaležnaści.
Nazva «Litva» była ŭzhadanaja ŭ Kviedlinburhskim letapisie, datavanym 1009 hodam.