Kandydata ŭ deputaty, jakoha zatrymali ŭ Kurapatach, źniali z vybaraŭ
Kandydata ŭ deputaty ad Biełaruskaj chryścijanskaj demakratyi Źmitra Kazakieviča, jaki byŭ 3 listapada zatrymany i źbity ŭ Kurapatach, źniali z vybaraŭ, paviedamlaje sajt BCHD.
Minskaja Śvisłackaja kamisija 5 listapada adzinahałosna prahałasavała za jaho źniaćcie.
«Bolš ja nie kandydat», — adznačyŭ aktyvist. Pavodle jaho, źniaćcie było absalutna sprahnazavanym rašeńniem.
Raniej stała viadoma, što Źmitra Kazakieviča, jaki byŭ zatrymany i źbity 3 listapada ŭ Kurapatach, vyklikajuć u akruhovuju Śvisłackuju kamisiju № 94 na «surjoznuju razmovu».
Kazakieviča zatrymali 3 listapada za sprobu prajści na terytoryju restarana «Pojediem-pojedim» la Kurapataŭ. Na jaho skłali administracyjnyja pratakoły za chulihanstva i niepadparadkavańnie supracoŭnikam milicyi.