Čynoŭnicu ofisa Zialenskaha zatrymali za vymahańnie chabaru ŭ $ 300 tysiač
Nacyjanalnaje antykarupcyjnaje biuro Ukrainy (NABU) zatrymała kiraŭnika adnaho z hałoŭnych departamientaŭ ofisa prezidenta Ukrainy Uładzimira Zialenskaha. Za dapamohu ŭ pracaŭładkavańni ŭ «Naftahaz Ukrainy» jana patrabavała 300 tysiač dalaraŭ. Pra heta paviedamlaje pres-słužba viedamstva, piša tut.by.
Ukrainskija ŚMI pišuć, što zatrymali žančynu na zdymku - dyrektarku departamienta zabieśpiačeńnia dostupu da publičnaj infarmacyi ŭ ofisie prezidenta Ukrainy Śviatłanu Kandzielu. Fota: telekanał «112. Ukraina »
«Hety čałaviek pracavaŭ u roznych departamientach administracyi prezidenta ad 2005 hoda. Dla kiraŭnika dziaržavy niama «svaich» i «čužych». Karupcyja pavinna być vykaraniena: čym vyšejšy post karupcyjaniera, tym bolš niebiaśpiečnyja dla dziaržavy złoŭžyvańni ź jaho boku», - havorycca ŭ zajavie ŭ Facebook administracyi prezidenta Ukrainy.
Antykarupcyjnaja prakuratura Ukrainy ŭdakładniaje, što zatrymali žančynu.
«Padčas tajemnych śledčych vyšukovych dziejańniaŭ zadakumientavany fakt vymahalnictva ź fizičnaj asoby 300 tysiač dołaraŭ ZŠA niepravamiernaj vyhady za sadziejničańnie ŭ pryznačeńni na kirujučuju pasadu ŭ NAK «Naftahaz Ukrainy»», - paviedamili ŭ prakuratury.
Jak adznačaje viedamstva, kiraŭnicu departamienta ofisa, jaje pamočnicu — byłuju namieśnicu ministra kultury Ukrainy (u 2011 hodzie) i inšych udzielnikaŭ hrupy zatrymali paśla atrymańnia pieršaha tranšu ŭ 150 tysiač dalaraŭ.
«Ukrainskaja praŭda» sa spasyłkaj na krynicy ŭ pravaachoŭnych orhanach paviedamiła, što supracoŭniki NABU zatrymali Śviatłanu Kandzielu, dyrektarku departamienta zabieśpiačeńnia dostupu da publičnaj infarmacyi ŭ ofisie prezidenta Ukrainy. U vydańni adznačyli, što jana vychvalałasia tym, što moža vyrašyć lubuju prablemu dziakujučy suviaziam ŭ administracyi prezidenta.
Jaje chaŭruśnicaj, pavodle «Ukrainskaj praŭdy», vyjaviłasia eks-namieśnica ministra kultury Ukrainy Viktoryja Laśničaja.