Draŭlanaha Vitaŭta viarnuli da hrodzienskich zamkaŭ
Praz dva miesiaca adnaŭlenčych rabot statuju Vitaŭta viarnuli da hrodzienskich zamkaŭ. Ratavaŭ haradskuju skulpturu raźbiar pa drevie Mikałaj Sklar, paviedamlaje hrodna.life
Kolki jašče prastaić draŭlany Vitaŭt kala zamkaŭ, Mikałaj Sklar skazać nie moža. Majstar adznačaje, što pieršapačatkova statuju niapravilna zamacavali i nie sačyli za joj ciaham doŭhich hadoŭ
«Ja zrabiŭ usio što moh, ale harantyj ja nie daju nijakich, — raspaviadaje raźbiar. — Raskoliny ja nie zamazvaŭ, ŭnutry ačyścili ad hnilla i ŭsiaho inšaha, umacavali ŭsie tam, a taksama pastavili adpaviednuju armaturu. Paśla pačyścili i pakryli admysłovym nasyčeńniem, jakoje na niekatory čas abaronić skulpturu ad vilhaci. Ja dumaju, Vitaŭt jašče piać hadoŭ dakładna prastaić, a tam budzie vidać. Praz hod treba jašče raz budzie pakryć nasyčeńniem, a potym jašče raz. Kali chtości budzie hetym zajmacca, značyć skulptura prastaić daŭžej».
Nahadajem, 30 vieraśnia haradskija słužby adreahavali na materyjał Hrodna.life nakont avaryjnaha stanu draŭlanaj statui Vitaŭta. Śpiecyjalnaja kamisija vyrašyła časova prybrać skulpturu, pakul jana sama nie ŭpała. Jaje pieravieźli na adno z pradpryjemstvaŭ ŽKH i pačali detalova abśledavać.
Praź dzień paśla demantažu skulptury ŭ internecie źjaviłasia pietycyja za ŭstanoŭku bronzavaha pomnika vialikamu kniaziu. Pietycyju padpisała 1000 čałaviek. Błohier Jaŭhien Asnareŭski 14 listapada atrymaŭ adkaz z harvykankamu na pietycyju za ŭstanoŭku novaha pomnika Vitaŭtu ŭ Hrodnie. Stała viadoma, što haradskija ŭłady ŭ najbližejšaj budučyni płanujuć viarnuć draŭlanuju statuju vialikaha kniazia da zamkaŭ paśla restaŭracyi. Novaha pomnika ŭ płanach pakul niama.
Statuju vialikaha kniazia litoŭskaha Vitaŭta pastavili kala hrodzienskich zamkaŭ jašče ŭ pačatku 90-ch hadoŭ. Skulptura stała padarunkam horadu ad Litoŭskaha fondu kultury. Padobny draŭlany Vitaŭt byŭ pastaŭleny i ŭ Trakai.