Kaho abjadnała arhanizacyja «Bunt»?
U Biełarusi pačaŭ dziejničać navastvorany moładzievy ruch, jaki ŭ Viciebsku prezentavaŭ siabie pad nazvaj «Bunt».
U Biełarusi pačaŭ dziejničać navastvorany moładzievy ruch, jaki ŭ Viciebsku prezentavaŭ siabie pad nazvaj «Bunt».
Minułaj nočču ŭ Viciebsku źjavilisia hrafici «Bunt», na dachu teatru imia Jakuba Kołasa była vyviešanaja raściažka sa słovam «Bunt», u horadzie raspaŭsiudžvalisia ŭlotki z nadpisam «Bunt» i zaklikam dałučacca da niehvałtoŭnaha supracivu i zmahańnia za svabodu Biełarusi. Aktyvisty taksama sprabavali vyviesić bieł-čyrvona-bieły ściah la amfiteatru. Niekatoryja ŭdzielniki hetych akcyjaŭ byli zatrymanyja.
Adzin z aktyvistaŭ ruchu 27-hadovy Dzianis Dzianisaŭ patłumačyŭ, što nazva «Bunt» – prosta zaklik, i ŭ pracesie dziejnaści jon moža mianiacca. Paŭstaŭ moładzievy ruch paśla prezydenckich vybaraŭ.
(Dzianisaŭ: ) «Prosta było mnoha ludziej novych, zusim nie zaanhažavanych, byli ludzi, jakija chacieli niešta rabić niejak pa-inšamu, bolš aktyŭna. My vyrašyli aktyvizavać biełaruskaje nasielnictva, skazać, što vybary byli sfalšavanyja j nia treba čakać piać hadoŭ, bo ŭ nas niama lehitymnaha prezydenta. Treba padymacca!»
Pavodle spadara Dzianisava, akcyi buduć ładzicca va ŭsioj Biełarusi – nia tolki ŭ bujnych haradach, ale i ŭ vioskach. Jon adznačyŭ, što aktyvisty «Buntu» ŭ značnaj stupieni pazytyŭna staviacca da hramadzianskaj kampanii «Za svabodu», ale neŭtralna – da palityčnaj.
(Dzianisaŭ: ) «Ja nie chacieŭ by, kab mianie źviazvali ŭ dadzienym vypadku z Abjadnanaj hramadzianskaj partyjaj. Ja, da prykładu, siabra AHP, ale heta nie aznačaje, jak niekatoryja havorać, što ja - kazyrnaja karta Labiedźki. Tamu što nas padtrymlivajuć roznyja lidery i ŭ nas meta adna. Prosta my chočam bolš aktyŭnych dziejańniaŭ».
Pavodle Dzianisa Dzianisava, navastvorany ruch abjadnaŭ siabroŭ byłoha moładzievaha ruchu «Zubr», jaki paśla vybaraŭ, u traŭni, zajaviŭ, što pierapyniaje dziejnaść pad svaim brendam, a taksama «Maładoha frontu» i maładych aktyvistaŭ-demakrataŭ. Ale da jaho dałučyłasia značnaja kolkaść novych ludziej. Ci piarojmie «Bunt» metady dziejnaści «Zubra»?
(Dzianisaŭ: ) «Metady «Zubra» – ja b prosta da ich nie pryviazvaŭsia. My budziem dziejničać svaimi metadami. Ja dumaju, što tut treba karystać luby sposab uździejańnia. Naša zadača asnoŭnaja – zmabilizavać niepasredna nasielnictva».