Člen kamisii pa źmianieńni Kanstytucyi Rasii: Pavinna być zamacavana prava dałučeńnia abłaściej Biełarusi da Rasii
Adzin ź lidaraŭ arhanizacyi «Ukraincy Rasii» (butaforskaja arhanizacyja, jakaja funkcyjanuje pad pratežyravańniem rasijskaha ŭrada) Bahdan Biacpalka, jaki ŭvajšoŭ u kamisiju pa źmianieńni Kanstytucyi Rasii, raskazaŭ vydańniu Ukraina.ru, jakija źmieny pavinny być uniesieny ŭ asnoŭny zakon Rasii.
Bahdan Biaspalka (źleva). Fota z fejsbuka Siarhieja Kandyboviča.
Biacpalka zajaviŭ, što chacieŭ by ŭbačyć u novaj kanstytucyi ablahčeńnie dla hramadzian Ukrainy ŭstupleńnia ŭ rasijskaje hramadzianstva.
«Ja vielmi na heta spadziajusia i, viadoma, mnie asabista vielmi chaciełasia b ubačyć hetyja normy ŭ Kanstytucyi Rasii. I nie tolki ŭ dačynieńni da Ukrainy, ale i Biełarusi. Heta dazvoliła b u značnaj miery vyrašyć demahrafičnuju prablemu — masa hramadzian Ukrainy i Biełarusi atrymali b mahčymaść brać udzieł u budaŭnictvie i adradžeńni Rasii. Nahadaju, što prablemu demahrafii ŭ svaim pasłańni prezident nazvaŭ jak prablemu asnoŭnuju, samuju niebiaśpiečnuju, što pahražaje samomu isnavańniu našaj krainy.
Mnie b vielmi chaciełasia, kab prava na iredentu — uźjadnańnie usiaho Ruskaha śvietu — było zamacavana nie prosta ŭ zakanadaŭstvie, ale i ŭ Kanstytucyi Rasii. Tady b luby rehijon nie tolki Ukrainy, ale i Biełarusi mieŭ by mahčymaść dałučeńnia da Rasii na padstavie hetaha pałažeńnia Kanstytucyi, a nie tolki pałažeńnia ab pravie nacyj na samavyznačeńnie», — skazaŭ Biazpalka.