Uźbiek nielehalna pierajšoŭ biełaruska-litoŭskuju miažu ŭ šapačcy z folhi, kab padmanuć ciepłavizar
Litoŭskija pamiežniki zatrymali hramadzianina Uźbiekistana, jaki, nadzieŭšy padšytuju folhaj vopratku, niezakonna pierajšoŭ biełaruska-litoŭskuju miažu, paviedamlaje «Fierhana» sa spasyłkaj na słužbu achovy dziaržaŭnaj miažy pry MUS Litvy.
Incydent zdaryŭsia 22 studzienia. Padazronaha čałavieka ŭ kamuflažy i z torbaj zaŭvažyli dziakujučy sistemie videanazirańnia. Mužčyna pierasiok miažu i syšoŭ uhłyb Litvy praź les. Nieŭzabavie na miesca zdareńnia prybyŭ kinołah z aŭčarkaj, jakaja dapamahła vyjavić schavanuju pad jałovymi halinkami mužčynskuju vopratku, čaraviki, šapku, palčatki. Rušyŭšy ŭśled za sabakam, jany ŭbačyli parušalnika miažy i zatrymali jaho. Im akazaŭsia 37-hadovy hramadzianin Uźbiekistana.
Vyjaŭlenyja ŭ lesie adzieńnie i šapka byli padšytyja folhaj. Uźbiek spadziavaŭsia, što takim čynam jon zmoža padmanuć ustanoŭlenyja na miažy ciepłavizary.