«Francužanki vytančanyja, a biełaruski sapraŭdnyja!» — Piać haračych vobrazaŭ u sučasnych vyšyvankach FOTY
Dyzajnierka Hanna-Maryja Ehlit robić vyšyvanki na sučasny manier. «Naša Niva» adkryła dziaŭčynu śvietu čatyry hady tamu. Pieršyja sukienki Hanna šyła adna ŭ siabie doma. A ciapier zhadziła ŭ dapamohu niekalki švačak, adkryła anłajn-kramu i abnaŭlaje kalekcyi kožnyja dva miesiacy.
My zavitali da dyzajnierki, kab pahladzieć apošnija madeli i pahutaryć pra modu na biełaruskaje.
Dyzajnierka Hanna-Maryja Ehlit.
«Ja nie mahu šyć pa starych tradycyjach: ja b sama takoje nie nadzieła nikoli ŭ žyćci, — kaža Hanna. — Voś ansambl «Charoški» — tak, im padychodzić dla sceny. Adzieńnie dla biełaruskaj sučasnaj dziaŭčyny dla mianie — heta inšaje. Našu pryrodnuju pryhažość ja chaču padkreślić ilnom i arnamientam. Nichto, napeŭna, nie robić vyšyvanki, jak ja. Usie maje sukienki pavietranyja, lohkija.
I kali dziaŭčaty vyjazdžajuć u ich na adpačynak, zaŭsiody pišuć mnie: «Ania, heta prosta kosmas. Na mianie ŭsie hladziać, pytajucca, adkul takaja pryhažość». Ja pa sabie viedaju: kali kudyści vychodžu ŭ vyšyvancy, heta zaŭsiody šmat uvahi».
Arnamienty na sukienkach dyzajnierka źmiaščaje nie tak, jak pravilna, a jak lepš hladzicca.
«Mianie ŭsie łajuć za heta, i ŭ vas na sajcie ja bačyła kamientary: «Jak tak možna!» — ale ž ja tvorčaściu zajmajusia, takoje majo bačańnie».
Cikava, što arnamient pry hetym ŭsio adno spracoŭvaje. Pa słovach dyzajnierki, chto ni kupić vyšyvanku ź simvałam «baba», usie ciažarajuć! Niekatoryja klijentki sami prosiać zašaptać ich adzieńnie na ŭdaču.
Bolšaść sukienak Hanna robić ź ilnu.
«Abažaju jaho. Lon lohka šyjecca, ja jaho adčuvaju na niejkim nievierahodnym uzroŭni. Choć nikoli nie dumała, što budu pracavać z hetym materyjałam. Kali ŭ kaledžy vučyłasia i nam kazali: «Kuplajcie lon» — ja dumała: «Nie, u mianie budzie skura, kašamir».
A ŭ tym, što lon mniecca, navat niejkaja razynka jość. Znajomyja lubiać pažartavać: hrudzi adkryješ, i nie bačna, što sukienka pamiataja. Ale ŭ mianie paŭsiul jość huziki, usio možna zašpilić», — śmiajecca dziaŭčyna.
Pa jaje nazirańniach, 90% pakupnic prosta nie ŭmiejuć dahladać za lnom. Tut jość niekalki praviłaŭ. Naprykład, kali sadzišsia, spadnicu musiš padniać. Zaŭsiody pad rukoj pavinna być vada: kali niedzie załom, možna papšykać sukienku, paprasavać — i jana znoŭ śviežańkaja. A myć lon treba biez vykručvańnia. Z farbavanaj tkaninaj — asabliva akuratna.
Zajzdraści z boku inšych dyzajnieraŭ Hanna nie zaŭvažaje. Ale kali pačynała, to pryznajecca, heta byŭ žach.
«Ja tolki źjaviłasia na modnych kirmašach, i mianie stavili ŭ samyja kuty, bo ja novieńkaja. Pamiataju svoj pieršy markiet: na mianie napisali čatyry skarhi! Dyzajniery prosta nie chacieli, kab ja pobač stajała. A ja nadziavała svaje sukienki, abcasy, farbavałasia ŭ vizažystaŭ i tak vychodziła na pracu. Ja pryjazdžała z 20 sukienkami, a źjazdžała — dźvie-try viešałki zastavalisia. Kaniečnie, astatnim nie padabałasia».
Kaśmičnyja rascenki biełaruskich madeljeraŭ (nie Chanel ža, kab stolki kaštavać) dziaŭčyna tłumačyć niedachopam abarotaŭ i ekskluziŭnaściu.
«My šyjem adnu-dźvie sukienki adnolkavyja, i ŭsio, bolš takoha nie robim. Kali idzie masoŭka, ty sadziš švačak, možaš ekanomić i za košt hetaha rabić tańniej adzieńnie. Ja ciapier vyrašyła aryjentavacca na masavuju vytvorčaść i źmianić cenavuju palityku. Ale heta nie značyć, što kožnaj madeli budzie pa 500 adzinak. Usio roŭna ekskluziŭnaść pakinu, bo ja dyzajnier. Adzieńnie praktyčna na 50% tańniej budzie. Raniej sukienka, na jakoj było šmat vyšyŭki, 200 dalaraŭ kaštavała, ciapier kala 100. A tak jość rečy i pa 80 rubloŭ».
Francužanki vytančanyja, ispanki impulsiŭnyja. Jakija biełaruski?
«Sapraŭdnyja, — ličyć Hanna. — My časam krychu nie ŭmiejem adziavacca, ale na našy tvary pahladzieć — pryhažość. U nas pryhožy narod. Chłopčyki nie, a dziaŭčaty — vielmi (śmiajecca).
Choć dziaŭčaty ŭ horadzie našmat lepš adziavajucca, čym 5-10 hadoŭ tamu. Asabliva ŭletku: vyjdzi na Zybickuju ci jašče kudy».
Dyzajnierka zadumvajecca nad tym, kab pačać modna adziavać i mužčyn.
«Čatyry hady mianie znajomyja ŭprošvajuć: «Kali łaska, pašyj». Heta dastatkova składana. Žanočaje adzieńnie ja baču: dzie jakaja vytačka pavinna być, jak abyhrać fihuru. A z mužčynami što rabić? Ale ja sprabavała šyć, cikava atrymlivajecca».
Akramia ŭłasnaha brenda, Hanna stvaralnica jašče i fešn-inkubatara dla dyzajnieraŭ WOWHOUSE. Minułym letam jana sabrała ŭvieś staličny bamond na modnym pakazie pasiarod kukuruznaha pola pad Minskam. Chutka Hanna zapuścić sajt, na jakim buduć pradstaŭlenyja roznyja biełaruskija madeljery, a taksama ceny na dyzajnierskaje adzieńnie i aksiesuary.