Błohier ź Viciebska vysypaŭ sudździ pad nohi viadro kostak
1 lutaha viciebski błohier Alaksandar Dubroŭskich byŭ vyzvaleny ź izalataru časovaha ŭtrymańnia, dzie adbyvaŭ 15 sutak. Na voli jon raspavioŭ «Viciebskaja Viaśnie», što «sutkami» jaho pakarali pa artykule 17.1 (drobnaje chulihanstva).
Padstavaj dla aryštu stała toje, što jon vykinuŭ pad nohi sudździ suda Viciebskaha rajona Ivanu Biełavusu kostki dla sabak. Za niekalki dzion da hetaha mienavita Biełavus aštrafavaŭ błohiera na 30 b.v.(810 rubloŭ) za ŭdzieł u minskich akcyjach suprać intehracyi.
Za «kostki dla sudździ Biełavusa» sud Viciebskaha rajona pakaraŭ Dubroŭskich 15 sutkami administracyjnaha aryštu, prypisaŭšy «chulihanku» i «niecenzurnuju łajanku ŭ hramadskim miescy». Sam Dubroŭskich śćviardžaje, što ŭ kabiniecie Biełavusa jon nie łajaŭsia.
Taksama błohier paviedamiŭ, što ŭmovy ŭtrymańnia ŭ viciebskim IČU «biesčałaviečnyja».
Pa vychadzie ź izalatara Alaksandr Dubroŭskich daviedaŭsia, što jaho asudzili jašče dva razy za akcyi suprać intehracyi z Rasiejaj pa artykule 23.34 KaAP.
20 studzienia sud Kastryčnickaha rajona Viciebsku aštrafavaŭ jaho na 30 bazavych vieličyniaŭ (810 rubloŭ) za ŭdzieł u minskaj akcyi 21 śniežnia (sudździa Ina Hraboŭskaja). A 29 studzienia u sudzie Čyhunačnaha rajonu Dubroŭskich aštrafavali na takuju ž sumu za ŭdzieł u viciebskim pikiecie 29 śniežnia.
Takim čynam, razam sa štrafam, prysudžanym Biełavusam, Alaksandr Dubroŭskich aštrafavany ahułam na 90 bazavych vieličyniaŭ (2430 rubloŭ) za ŭdzieł u akcyjach u padtrymku niezaležnaści i 15 sutkami — za akcyju «z kostkami dla sudździ».