Minabarony: Kali ŭ sałdata terminovaj słužby vyjaviać prablemy sa zdaroŭjem, jaho špitalizujuć
Ilustracyjnaje fota Siarhieja Hudzilina
Va Uzbrojenych siłach Biełarusi jość usie nieabchodnyja ŭmovy dla taho, kab nazirać za pryzyŭnikami, u jakich jość miedycynskija supraćpakazańni. Pra heta ŭ efiry «Panaramy» zajaviŭ načalnik vajenna-miedycynskaha ŭpraŭleńnia Ministerstva abarony Biełarusi Dźmitryj Alchovik, piša Tut.by.
— Kamandziry, miedycynskija rabotniki Uzbrojenych sił, jany, naturalna, za vajskoŭcami, jakija tolki pryjduć u vojska, buduć pilna sačyć. I pamyłkovym jość mierkavańnie, što pryzyŭnik pryjšoŭ va Uzbrojenyja siły, jamu adrazu dali poŭnuju nahruzku.
Alchovik adznačyŭ, što fizičnaja i psichałahičnaja nahruzka dla sałdat terminovaj słužby narastaje pastupova. Pry hetym va Uzbrojenych siłach isnuje pastajanny manitorynh za tym, jak vajskoviec spraŭlajecca z zadačami. Kali na niejkim etapie słužby ŭ sałdata terminovaj słužby vyjaviać prablemy sa zdaroŭjem, jaho špitalizujuć u miedsančastku, a pa nieabchodnaści nieadkładna dastaviać u balnicu.
U Biełarusi, nahadajem, źmianilisia patrabavańni da stanu zdaroŭja pryzyŭnikoŭ. U sacsietkach i na forumach tut ža stali abmiarkoŭvać, što ŭ vojska ciapier buduć zabirać usich. U Minabarony śćviardžajuć, što heta nie tak. Nijakich novych zachvorvańniaŭ u pastanovie «Ab vyznačeńni patrabavańniaŭ da stanu zdaroŭja hramadzian, źviazanych z vajskovym abaviazkam» nie źjaviłasia.
Maładyja ludzi, jakija raniej ličylisia sa svaimi dyjahnazami nieprydatnymi da słužby, a pa novym zakonie mohuć iści ŭ vojska, buduć zaličany ŭ zapas.
— Ich pieraaśviedčańnie budzie praviedziena va ŭstanoŭlenym paradku, jak heta prapisana narmatyŭnymi aktami. Heta značyć raz u try hady. Pazapłanavaje pieraaśviedčańnie pryzyŭnikoŭ, jakija znachodziacca ŭ zapasie pa stanie zdaroŭja, zaraz nie płanujecca, — tłumačyŭ raniej Dźmitryj Alchovik.