U Breście vynieśli prysud narviežcu, jakoha abvinavačvali ŭ piedafilii. A asudzili za chulihanstva
71-hadovaha Daha Viviestada pryznali vinavatym pavodle č 1.art 339 Kryminalnaha kodeksu Biełarusi «Chulihanstva». Spravu ŭ zakrytym režymie razhladaŭ sud Maskoŭskaha rajonu Bresta, piša Radyjo Svaboda.
Prysud pa Dahu Viviestadu — 6 miesiacaŭ kałonii ahulnaha režymu. Miera strymańnia raniejšaja — pad vartaj. Zaličany termin papiaredniaha źniavoleńnia. Taksama Viviestad apłocić sumu ekspertyz u sumie 2 rubli 22 kapiejki.
Narviežca zatrymali ŭ Breście 29 vieraśnia 2019 hoda. Jaho abvinavačvali pa č. 3 art. 167 Kryminalnaha kodeksa — «dziejańni seksualnaha charaktaru ŭ dačynieńni da zaviedama niepaŭnaletniaha». Pakarańnie pavodle hetaha artykuła praduhledžvaje ad 8 da 15 hadoŭ źniavoleńnia.
Što adbyłosia
Padrabiaznaści abvinavačańnia nie byli viadomyja navat svajakam asudžanaha. Advakaty, uličvajučy, što ŭ spravie fihuruje niepaŭnaletniaja, admaŭlalisia paviedamlać detali.
Žonka Viviestada N. raskazała Radyjo Svaboda, što abvinavačańnie moža zaklučacca ŭ epizodzie ŭ hateli «Biełaruś». Pavodle žonki, Viviestad sustreŭ tam hrupu dziaciej, pahutaryŭ sa starejšaj dziaŭčynkaj pa-anhlijsku i, zachapiŭšysia jaje viedańniem anhielskaj movy, pacałavaŭ jaje ŭ ščaku.
«Kali padsumavać (abvinavačańnie), to ŭ im havorycca, što Dah Viviestad u chole hatela «Biełaruś» na vačach šmatlikich śviedak utrymlivaŭ rukami i całavaŭ paciarpiełuju 10-hadovuju dziaŭčynku, nanosiŭ joj udary, sprabavaŭ vyciahnuć jaje na vulicu i pasadzić u aŭtamabil taksi», — paviedamiŭ Svabodzie rasijski advakat Illa Novikaŭ, jaki kansultavaŭ biełaruskuju advakatku narviežca.
Jak raskazvała žonka Viviestada, paźniej jaho i jahonaha siabra-narvežca na stajancy taksi mocna źbiła hrupa mužčyn. Pa słovach Novikava, niekatoryja z napadnikaŭ stali śviedkami abvinavačańnia Viviestada. U RUUS Maskoŭskaha rajona Bresta mocna źbitaha siabra paśla zdareńnia adpuścili, a Daha Viviestada zatrymali i pradjavili abvinavačańni pavodle 167-ha artykuła.
Pravierka ŭ spravie źbićcia była pryznačanaja tolki paśla taho, jak historyja stała viadomaja ŭ ŚMI. Pabity hramadzianin Narviehii śćviardžaje, što jamu praviali apieracyju z pryčyny naniesienaj unutryčarapnoj traŭmy.
Jon prybyŭ z Narviehii ŭ Brest, kab śviedčyć na sudzie ŭ padtrymku Daha Viviestada.
Svajaki zajaŭlajuć pra parušeńni pravoŭ Daha Viviestada
Plamieńnica i žonka narviežca śćviardžajuć, što jamu pahražali zbrojaj, nie dali pierakładčyka z narviežskaj movy ŭ pieršyja 72 hadziny aryštu. Pra jahony aryšt nie paviedamili ŭ ambasadu Narviehii. Na praciahu 5 dzion Daha ŭ ciažkich umovach pad kanvojem vieźli ŭ Minsk dla prachodžańnia psichijatryčnaj ekśpiertyzy, pry hetym nichto nie viedaŭ, dzie jon znachodzicca. Sustrečy z žonkaj i svajakami byli abmiežavanyja — za 4 miesiacy žonka bačyłasia ź im koratka 4 razy.