TASS: Biełaruś pačała zabirać technałahičnuju naftu z «Družby»
Biełaruś adbiraje technałahičnuju naftu dla naftapierapracoŭčych zavodaŭ (NPZ) z trubapravoda «Družba», paviedamiŭ TASS sa spasyłkaj na «Biełnaftachim».
U kancernie zajavili, što adbirajuć naftu, nie zadziejničanuju ŭ tranzicie zachodnim spažyŭcam, i patłumačyli, što heta adbyvajecca z-za «adsutnaści pastavak raniejšych abjomaŭ nafty».
«Heta naša nafta, jana znachodzicca ŭ našych trubach na našaj terytoryi», — skazaŭ pradstaŭnik kancerna.
Pavodle jaho słoŭ, usio vykonvajecca tak, kab nie paŭpłyvać na abjomy prapampoŭvańnia tranzitu i nie źnizić cisk. U kancernie taksama adznačyli, što rasijski bok byŭ prainfarmavany.
«Transnafta» paćvierdziła, što atrymała apaviaščeńnie. Jak adznačyli ŭ kampanii, heta nie akaža ŭpłyvu na tranzit z Rasii, ale pryviadzie da źnižeńnia prapusknoj zdolnaści na sami biełaruskija NPZ. «Z nahody vykarystańnia biełaruskimi NPZ technałahičnaj nafty z naftapravodaŭ dla pierapracoŭki — nas pra heta prainfarmavali našy biełaruskija partniory. Na tranzicie praź Biełaruś heta pakul nijak nie adbiłasia. Heta źnižeńnie prapusknoj zdolnaści na sami biełaruskija NPZ», — skazaŭ pradstaŭnik «Transnafty».