Pres-słužba «Dynama»: Šunievič pravioŭ siońnia naradu nakont kłuba
Praŭda, sajt kłuba, ilustrujučy hetu navinu, źmiaściŭ fota Šunieviča 2018 hoda, hcdinamo.by
Kiraŭnik Naziralnaj rady CHK «Dynama» Minski, eks-ministr unutranych spraŭ Ihar Šunievič pravioŭ 11 lutaha rabočuju sustreču z kiraŭnictvam kłuba, paviedamlaje pres-słužba kamandy.
«Siońnia kiraŭnik naziralnaj rady CHK «Dynama-Minsk» i hiendyrektar kłuba Dźmitryj Baskaŭ abmierkavali zaklučnuju stadyju rehularnaha pieršynstva KCHŁ, a taksama płany pa pracy kamandy da kanca siezona. Taksama temami sustrečy byli pierśpiektyva raźvićcia kłuba i padrychtoŭka «Dynama-Minsk» da nastupnaha spartyŭnaha siezona», — havorycca ŭ paviedamleńni na sajcie kłuba.
Raniej šerah ŚMI paviedamlaŭ pra mahčymaje zatrymańnie Ihara Šunieviča pa «cukrovaj spravie».