Premiju Syrycy ŭručyli za biełaruskamoŭnuju hrupu ŭ Smarhoni i praviadzieńnie kanfierencyi «Biełaruskaja dziaržaŭnaść»
Edzita Brancevič za apiekavańnie nad biełaruskamoŭnaj hrupaj u sadku ŭ Smarhoni i Chrystafor Žalapaŭ za praviadzieńnie kanfierencyi «Biełaruskaja dziaržaŭnaść. Historyja i sučasnaść» u Viciebsku abranyja łaŭretami premii imia Viktara Syrycy, jakuju Ruch «Za Svabodu» ŭručaje čaćviorty raz, paviedamlaje pres-słužba Ruchu.
Viktar Syryca, viadomy baranavicki krajaznaŭca, historyk, aktyvist, kaardynatar miascovaj supołki Ruchu «Za Svabodu» raptoŭna pamior u 2015 hodzie. U 2016 hodzie ŭ pamiać pra jaho Ruch «Za Svabodu» zasnavaŭ premiju jahonaha imia, jakoj uznaharodžvajuć aktyvistaŭ, jakija za minuły hod arhanizavali vybitnyja rehijanalnyja inicyjatyvy. U hetym hodzie na premiju pastupili 25 zajavak, ź jakich siem byli abranyja ŭ šort-list dla hałasavańnia Rady.
«Premija imia Viktara Syrycy dapamahaje źviarnuć uvahu na vartyja inicyjatyvy, kampanii na temu biełaruskaha adradžeńnia, jakija ładziacca ŭ rehijonach», — adznačyŭ na radzie staršynia Ruchu «Za Svabodu» Juryj Hubarevič.
Jon taksama adznačyŭ pazityŭ u tym, što akramia asnoŭnaha hałasavańnia źjaviłasia hramadskaje. «Takim čynam, hałasavańnie za łaŭreata premii vychodzić za miežy Ruchu «Za Svabodu». Pretendenty mohuć pryciahnuć ludziej, jakija viedajuć pra ich dziejnaść i padtrymlivajuć jaje», — dadaŭ palityk.
Pieramožcaj hramadskaha hałasavańnia stała Łarysa Ščyrakova za kampaniju «Zabityja i zabytyja» pa ŭšanavańni achviaraŭ stalinskich represijaŭ pad Homielem.