Nazvany talisman čempijanatu śvietu pa chakiei ŭ Biełarusi i Łatvii. I heta nie Chrušč Majs i nie łatvijski Vožyk FOTA
U štab-kvatery Nacyjanalnaha alimpijskaha kamiteta prezientavali aficyjny talisman čempijanatu śvietu pa chakiei z šajbaj-2022. Im staŭ Vožyk Spajki, paviedamlaje hockey.by.
Vybar pieramožcy byŭ davierany zornamu žury, u skład jakoha ź biełaruskaha boku ŭvajšoŭ lehiendarny chakieist Michaił Hraboŭski, čatyrochrazovaja alimpijskaja čempijonka Darja Domračava, rezident Comedy Club Andrej Skarachod, salist hrupy Bi-2 Šura, čempijon UFC Andrej Arłoŭski, alimpijskaja čempijonka pa frystajle Hanna Huśkova, hiendyrektar «Biełaruśfilma» Uładzimir Karačeŭski i staršynia FCHB Hienadź Saviłaŭ. Z łatvijskaha — prezident fiederacyi chakieja Łatvii Ajhars Kałvicis, televiadučyja Armands Simsans i Ajvis Cieryńš, kiraŭnik arhkamiteta turniru ŭ Łatvii Edhars Buncis, hitaryst Brainstorm Janis «Magic» Jubałts, śpiavak Intars Busulis i Kaspars Bułs, vykanaŭčy dyrektar mabilnaha apieratara BITE Latvia.
Svoj vybar na karyść toj ci inšaj raboty zrabili kala 8000 karystalnikaŭ, a ŭładalnikami pryza hladackich simpatyj stali Dźmitryj Halinoŭski i Pavieł Marčankaŭ, jakija prapanavali ideju Chrušča Majsa. Łatvijskija zaŭziatary prahałasavali za inšaha vožyka (na fota źnizu).
U vyniku žury spyniłasia na inšym vožyku, adznačyŭšy, što žyviolina — adzin z najbolš papularnych piersanažaŭ u mifałohii Biełarusi i Łatvii, adnak u vizualnym vykanańni ŭsich pradstaŭlenych u konkursie vožykaŭ brakavała dynamiki i enierhičnaści.
Darečy, hetaja ideja raniej znajšła adlustravańnie i ŭ słohanie čempijanatu śvietu 2021 hoda — Passion No Borders (Žarść bieź miežaŭ), i ŭ jaho łahatypie, na jakim sabranyja kolery nacyjanalnych ściahoŭ usich krain-udzielnic turniru. U hrafičnym vykanańni biezumoŭnym lidaram, na dumku žury, byŭ Janot Hulaka.
Tamu było vyrašana pasprabavać skampilavać abiedźvie idei, kab vynikovy varyjant sabraŭ u sabie ŭsio lepšaje ad najbolš papularnych siarod žury rabot. Dapracavać vobraz było prapanavana pieramožcu konkursu raspracoŭcy maskota — kreatyŭnamu ahienctvu DAB. Vynikam staŭ Vožyk Spajki, jaki i pradstaŭleny ŭ jakaści aficyjnaha talismana ČS.
— Maskot čempijanatu śvietu stanie simvałam Biełarusi i Łatvii, simvałam chakieja, tamu my šukali ahulnaje, stvarali historyju, układvali ŭ piersanaža bajavy charaktar, — raspavioŭ Mikita Uścinovič, dyrektar kreatyŭnaha ahienctva DAB. — My chacieli zrabić simvał čempijanatu lubimčykam usich zaŭziataraŭ i tych, chto abyjakavy da hulni.
Vožyk — naš hieroj.
Prajecyrujučy jaho charaktar i ŭłaścivaści na chakiejnuju placoŭku, my ŭbačyli, što vobraz vožyka vielmi dobra pasuje dla abiedźviuch našych zbornych — pracavityja, chutkija, sprytnyja, zdolnyja ŭ patrebny momant dać adpor na spartyŭnaj arenie.
ČS pa chakiei ŭ 2021 hodzie projdzie adrazu ŭ dvuch haradach: Minsku i Ryzie. Adna hrupa budzie hulać u Biełarusi, druhaja ŭ Łatvii. Matčy płej-of projduć u Minsku.