ABSIE vypracavała 32 rekamiendacyi pa praviadzieńni vybaraŭ u Biełarusi
Biuro pa demakratyčnych instytutach i pravach čałavieka (BDIPČ) ABSIE apublikavała vynikovuju spravazdaču ab nazirańni za parłamienckimi vybarami ŭ Biełarusi ŭ listapadzie minułaha hoda. Biuro vypracavała 32 rekamiendacyi dla palapšeńnia vybarčaha pracesu, pra heta paviedamlaje tut.by sa spasyłkaj na pres-słužbu arhanizacyi.
Biełaruskim ŭładam rekamiendujuć pierahledzieć vybarčaje zakanadaŭstva ŭ adpaviednaści z raniej dadzienymi BDIPČ rekamiendacyjami, u tym liku ŭ dačynieńni da składu vybarčych kamisij, pravoŭ kandydataŭ i naziralnikaŭ, pracedur hałasavańnia, padliku hałasoŭ. Taksama ŭkazvajecca na nieabchodnaść ukaranić prazrystyja pracedury padliku biuleteniaŭ, palepšyć prazrystaść daterminovaha hałasavańnia.
Ekśpierty BDIPČ ABSIE padkreślili, što Biełarusi treba pryvieści zakanadaŭstva, jakoje tyčycca svabody praviadzieńnia schodaŭ i vykazvańnia mierkavańniaŭ, u adpaviednaść ź mižnarodnymi standartami, zabiaśpiečyć prava asobnych asob i hrup stvarać svaje palityčnyja partyi bieź nieapraŭdanych abmiežavańniaŭ.
U spravazdačy taksama źmiaščajucca rekamiendacyi dla palapšeńnia miechanizmu rehistracyi kandydataŭ, kab pavysić transparentnaść pracesu i paźbiehnuć admovaŭ u rehistracyi ŭ vyniku małavažnych niedakładnaściaŭ u padadzienych imi dakumientach.
Akramia taho, BDIPČ ABSIE zaklikała biełaruskija ŭłady admianić apłatu za praviadzieńnie publičnych mierapryjemstvaŭ da, padčas i paśla vybaraŭ (užo hod u Biełarusi dziejničajuć «taryfy na pikiet» — arhanizatary masavych mierapryjemstvaŭ pavinny apłacić pasłuhi milicyi, vydatki na miedabsłuhoŭvańnie i ŭborku terytoryi padčas akcyj).
Parłamienckija vybary ŭ Biełarusi adbylisia 17 listapada 2019 hoda. Pa vynikach vybaraŭ u parłamient nie trapiła nivodnaha apazicyjnaha kandydata ŭ deputaty.
18 listapada 2019 hoda naziralniki ad ABSIE zajavili, što parłamienckija vybary ŭ Biełarusi prademanstravali «poŭnuju adsutnaść vykanańnia demakratyčnych abaviazacielstvaŭ». MZS Biełarusi adkazaŭ ABSIE, što «my pravodzim vybary dla svajoj krainy i naroda, a nie va ŭhodu źniešnim siłam». Jeŭrasajuz nazvaŭ minułyja vybary «stračanaj mahčymaściu».