Miedyki raspaviali, jak budzie pracavać praviła pra «chatni karancin» dla tych, chto viarnuŭsia z-za miažy
Hałoŭny sanitarny doktar krainy Natalla Žukava raskazała, jak budzie pracavać patrabavańnie ŭrada ab abaviazkovym 14-dzionnym karancinie dla tych, chto pryjechaŭ z krain, dzie zafiksavany vypadki karanavirusa, paviedamlaje Tut.by.
— Pastanova Saŭmina pa režymie samaizalacyi nakiravana na toje, kab našy hramadzianie vykarystoŭvali pradstaŭlenuju mahčymaść i minimizavali svaje kantakty. Zaraz my raźličvajem, što ŭzroŭniu samaśviadomaści, ŭzroŭniu viedaŭ pra situacyju ŭ śviecie, dastatkova dla taho, kab kožny hramadzianin adkazna padyšoŭ da svajho zdaroŭja i zdaroŭja svaich blizkich, — skazała Natalla Žukava.
Pa słovach hałoŭnaha sanitarnaha doktara, miery administracyjnaha ŭździejańnia albo pryciahnieńnie siłavych struktur, kab prymusić vykonvać praviły chatniaha karancinu, pakul nie razhladajucca.
— Vyklučeńnie — tyja, chto prybyŭ z epidemijałahična niespryjalnych krain. Tut my pracujem z orhanami ŭnutranych spraŭ, kantralujem samaizalacyju, — raspaviała Natalla Žukava.
Pavodle jaje słoŭ, tyja, chto pierasiakaje miažu siońnia, nie padlahajuć abaviazkovamu kantrolu na najaŭnaść karanavirusa. Samaje hałoŭnaje, niezaležna ad vyniku, kab čałaviek u abaviazkovym paradku 14 dzion znachodziŭsia ŭ režymie samaizalacyi. Kali źjaŭlajucca simptomy, pacyjent abaviazany vyklikać doktara. U hetym vypadku ŭ jaho voźmuć mazok na karanavirus.
Nahadajem, z 27 sakavika, pa pastanovie Savieta ministraŭ, usie ludzi, jakija prybyli ŭ Biełaruś z krain, u jakich rehistrujucca vypadki infiekcyi COVID-19, na praciahu 14 kalandarnych dzion z dnia pryjezdu:
pavinny znachodzicca ŭ samaizalacyi ŭ chatnich umovach;
nie padlahajuć nastupnamu propusku praź miažu Biełarusi (da zakančeńnia terminu samaizalacyi).
Vyklučeńnie zroblena dla niekalkich katehoryj hramadzian, u tym liku dla dypłamataŭ, dalnabojščykaŭ i tych, chto viartajecca dadomu ŭ inšuju krainu tranzitam praź Biełaruś.