Mastak Alaksiej Maračkin akazaŭsia zabłakavanym u Čarnahoryi z-za karanavirusa
Fota Siarhieja Hudzilina
Hrupa biełaruskich mastakoŭ źjechała na plener jašče 2 sakavika, paviedamlaje «Narodnaja vola».
Hetaje mierapryjemstva arhanizavaŭ čarnahorski biznesmien Ratka Papovič, pryčym robić jon heta ŭžo nie pieršy hod. Vysoka ŭ harach pradastaŭlaje biełaruskim mastakam žyllo i charčavańnie za svoj košt, i ludzi miesiac spakojna zajmajucca tvorčaściu. Raspłačvajucca, jak heta pryniata, svaimi karcinami. Voś i hetaj viasnoj čaćviora mastakoŭ — Alaksiej Maračkin, Natalla Pinievič, Aleś Falej i Nastaśsia Patvorava — pryjechali ŭ Čarnahoryju ŭ pačatku sakavika.
I ŭ Minsk pavinny byli viarnucca nie paźniej za 3 krasavika. Ale zaraz ich adjezd adkładajecca jak minimum na 20 dzion, bo na čas karancinu avijazłučeńnie spyniena.
Zrešty, dziŭnaja sprava: nastroj va ŭsich mastakoŭ, jak paviedamiŭ nam syn Alaksieja Maračkina, jaki trymaje suviaź z hrupaj, šykoŭny. Ihar Maračkin padzialiŭsia takimi siamiejnymi navinami:
— Baćka z hałavoj syšoŭ u pracu. Jon, praŭda, schudnieŭ, ale zatoje jak dobra vyhladaje! Usio tamu, što chodzić pa harach, pje chatniaje vinahradnaje vino i nie jeść sałodkaha, jak u Minsku pryvyk: ziefir, razynki i vafli. Da mora niablizka, treba spuskacca dziesiać kiłamietraŭ. Tak, u ich rasparadžeńni jość aŭtamabil, ale ŭ mašynie možna jechać tolki pa dvoje: kiroŭca i pasažyr na zadnim siadzieńni. Takija ciapier u Čarnahoryi praviły. Naohuł kraina z-za virusa abiaźludzieła: haścinicy na ŭźbiarežžy nie pracujuć, kafe začynienyja, darohi na plaž pierakryty. Zastajucca tolki hory. Darečy, dzień tamu tam vypaŭ vialiki śnieh. Baćka radujecca: narešcie z kvietak, z naciurmortaŭ jon piarojdzie na zimovyja krajavidy. Zasumavaŭ pa śniezie.