Ministry zamiežnych spravaŭ ES razyšlisia ŭ dumkach nakont zaprašeńnia Łukašenki
Adnak Fierera-Valdner choča dać Łukašenku šaniec.
U piatnicu ministry zamiežnych spravaŭ Eŭraźviazu pačali dvuchdzionnuju niefarmalnuju sustreču ŭ zamku Hłuboka nad Vłtavaj u paŭdniovaj Čechii, domie prodkaŭ českaha ministra zamiežnych spravaŭ Kareła Švarcenberha.
U hetych niefarmalnych abstavinach ministry abmiarkoŭvajuć pierš za ŭsio perspektyvy pašyreńnia Eŭraźviazu na šeść bałkanskich krainaŭ — Albaniju, Bośniju i Hiercahavinu, Makiedoniju, Čarnahoryju, Serbiju i Charvatyju. Druhoje važnaje pytańnie — zaprašeńnie Alaksandra Łukašenki na samit Eŭraźviazu ŭ Prazie 7 traŭnia, kali adbudziecca aficyjnaja inaŭhuracyja Ŭschodniaha partnerstva..
Paśla pieršaha dnia sustrečy Švarcenberh skazaŭ žurnalistam, što siońnia ministry Eŭraźviazu jašče nia vyrašyli, zaprašać Łukašenku ci nie.
Pazycyju Eŭrapiejskaj kamisii nakont zaprašeńnia Łukašenki na samit ahučyła Benita Ferera‑Valdner, eŭrakamisar pa zamiežnych suviaziach, jakaja pierad niefarmalnaj sustrečaj ministraŭ u českim zamku skazała žurnalistam, što zaprašać Łukašenku ŭžo siońnia było b zarana.
Ministar zamiežnych spraŭ Niderlandaŭ Maksim Ferchahen siońnia ŭ časie niefarmalnaj sustrečy kiraŭnikoŭ MZS Eŭraźviazu ŭ českim Hłuboka nad Vłtavaj čarhovym razam zajaviŭ, što suprać ŭdziełu biełaruskaha kiraŭnika Alaksandra Łukašenki ŭ travieńskim samicie ŭ Prazie.
Jon ličyć, što padobnaje zaprašeńnie aŭtakrata stanie svajho rodu zapluščvańniem vačej na brutalnuju sytuacyju z pravami čałavieka ŭ hetaj krainie. Pavodle Ferchahena, «Łukašenku nielha davać palityčnaj trybuny».
Jak padajuć eŭrapiejskija ŚMI sa spasyłkaj na eŭrakamisara Benitu Ferera‑Valdner,
ministry jašče nie pryniali kančatkovaha rašeńnia pa hetym pytańni.Sama eŭrakamisar za toje, kab dać Łukašenku «jašče adzin šaniec».
Pavodle jaje słoŭ, nieabchodna pačakać i pahladzieć, «jak padziei buduć raźvivacca», majučy na ŭvazie svoj vizyt u Miensk u krasaviku, sustrečy ź biełaruskimi ŭładami dy niaŭradavymi pravaabarončymi arhanizacyjami.
Eŭrapiejskaja kamisija spadziajecca, što ŭ jaje atrymajecca naładzić bolš ščylnyja suviazi z usimi šaściu krainami — udzielnicami «Ŭschodniaha partnerstva». Start hetaj prahramy budzie dadzieny 7 traŭnia na samicie EZ u Prazie.