Zaprašać abo nie zaprašać
Kiraŭniki MZS krain ES vykazali roznyja pazicyi adnosna ŭdziełu Alaksandra Łukašenki ŭ samicie Uschodniaha partniorstva.
Udzielniki niefarmalnaj sustrečy ministraŭ zamiežnych spraŭ krain Jeŭrasajuza, jakaja prachodzić 27—28 sakavika ŭ češskim horadzie Hłubaka, prytrymlivajucca roznych pazicyj adnosna zaprašeńnia Alaksandra Łukašenki na majski samit dziaržaŭ — udzielnic prahramy ES "Uschodniaje partniorstva".
Tak, naprykład, pierad pačatkam sustrečy kamisar pa źniešnich suviaziach i palitycy dobrasusiedstva ES Bienita Fierera-Valdnier vykazała mierkavańnie, što vyrašać pytańnie ab zaprašeńni prezidenta Biełarusi na majski samit "pakul jašče rana", paviedamlajuć češskija ŚMI. Biełarusi, ličyć jeŭrakamisar, treba dać jašče adzin šans dla taho, kab kraina "zrabiła dalejšyja kroki", adnak jakija mienavita, Fierera-Valdnier nie kankretyzavała.
Suprać zaprašeńnia Łukašenki na samit vystupajuć Niderłandy."My ličym, što prezidentu Łukašenku nielha davać palityčnuju płatformu 7 maja", — zajaviŭ u chodzie debataŭ hałandski ministr zamiežnych spraŭ Maksim Vierchahien.
U toj ža čas kiraŭnik MZS Słavakii Mirasłaŭ Łajčak ličyć, što, kali ES žadaje nablizić biełarusaŭ da Jeŭropy i jeŭrapiejskich kaštoŭnaściaŭ, supracoŭnictva z aficyjnym Minskam nieabchodnaje.
Pytańnie ab zaprašeńni Łukašenki na samit Uschodniaha partniorstva abmiarkoŭvaŭsia taksama 25 sakavika na pasiadžeńni Jeŭraparłamienta ŭ Strasburhu. Jak paviedamiła RIA Novosti sa spasyłkaj na pradstaŭnika pres-słužby Jeŭraparłamienta, mnohija parłamientaryi ŭ chodzie debataŭ vykazalisia suprać zaprašeńnia A.Łukašenki ŭ suviazi z tym, što biełaruskija ŭłady praciahvajuć parušać pravy čałavieka.
U pačatku krasavika na siesii ŭ Brusieli Jeŭraparłamient płanuje pryniać rezalucyju pa Biełarusi. Hałasavańnie budzie pravodzicca pa vynikach debataŭ, jakija adbylisia ŭ Strasburhu.
Nahadajem, 20 sakavika lidery krain ES uchvalili novuju prahramu "Uschodniaje partniorstva" z udziełam šaści postsavieckich krain — Azierbajdžana, Armienii, Biełarusi, Hruzii, Małdovy i Ukrainy.
Samit Uschodniaha partniorstva pavinien prajści 7 maja ŭ Prazie abo Brusieli.