Raspracavana novaja ekskursijnaja prahrama «Siem cudaŭ Minščyny»
Ni Linii Stalina, ni budynka Nacyjanalnaj biblijateki, ni nacyjanalnaha zapaviednika "Drazdy" tam niama.
Pra heta paviedamiła dyrektar turystyčnaha pradpryjemstva «Sołvieks» Aksana Bičun 1 krasavika na prezientacyi letnich ekskursijnych prahram u Minsku.
Pavodle jaje słoŭ, ekskursija raspracavana pa vynikach akcyi, prymierkavanaj da 70‑hodździa Minskaj vobłaści. Jana prachodziła z 11 kastryčnika 2007 hoda. Praź interniet‑hałasavańnie ŭsim žadajučym prapanoŭvałasia vyznačyć siem samych značnych architekturnych pomnikaŭ vobłaści z 46, vybranych śpiecyjalistami.
U vyniku ŭ maršrut ekskursii ŭklučany nastupnyja abjekty:
Vaskrasienski sabor u Barysavie, kaścioł Naradžeńnia Panny Maryi ŭ Budsłavie, kaścioł Uźvižańnia Śviatoha Kryža ŭ Vilejcy, kaścioł Archanhieła Michaiła i kaścioł Śviatoha Alaksieja ŭ Iviancy, pałacava‑parkavy ansambl i farny kaścioł Najśviaciejšaha Božaha cieła ŭ Niaśvižy.
Ekskursija raźličana na dva dni. Jak ličyć A.Bičun, jana asabliva padychodzić dla turystaŭ‑inšaziemcaŭ abo karparatyŭnych hrup.
«Maršrut ekskursijnaha tura asabliva bahaty na žyvapisnyja miescy», — zaznačyła dyrektar turfirmy. Pavodle jaje słoŭ, turysty majuć mahčymaść ubačyć pryhažość Nalibockaj puščy, reki Bierazinu i Viliju. Akramia taho, u chodzie ekskursii turystam raskazvajuć mnostva lehiend ab słavutych ludziach, jakija prasłavili Biełaruś za jaje miežami.
Jak zaznačyła A.Bičun, pa kožnym ź siami abjektaŭ raspracavany asobnyja ekskursii.