Łukašenka padpisaŭ ukazy pa sacyjalnaj abaronie rabotnikaŭ va ŭmovach pandemii
Alaksandr Łukašenka padpisaŭ dva ŭkazy, nakiravanyja na pavyšeńnie sacyjalnaj abaronienaści rabotnikaŭ va ŭmovach pieraadoleńnia ŭ suśvietnaj i nacyjanalnaj ekanomikach nastupstvaŭ prociepidemičnych mier, jakija realizujucca, paviedamlaje BiełTA.
Kiraŭnik dziaržavy padpisaŭ ukaz numar 178 «Ab časovych mierach dziaržaŭnaj padtrymki najmalnikaŭ i asobnych katehoryj hramadzian». Dakumient pryniaty ŭ metach minimizacyi ŭpłyvu na ekanomiku Biełarusi suśvietnaj epidemijałahičnaj situacyi i zabieśpiačeńnia sacyjalnaj stabilnaści.
Ukazam praduhledžana mahčymaść atrymańnia najmalnikami subsidyj dla dapłaty da minimalnaj zarabotnaj płaty svaim rabotnikam u vypadku ich vymušanaj niapoŭnaj zaniataści abo abjaŭleńnia prastoju ŭ pieryjad z 1 maja pa 31 lipienia, a taksama vypłaty ŭznosaŭ u dziaržaŭny pazabiudžetny fond sacyjalnaj abarony nasielnictva.
Rašeńnie ab pradastaŭleńni subsidyj budzie prymacca miascovym vykanaŭčym i rasparadčym orhanam, a pieraličeńnie hrašovych srodkaŭ — orhanam Fondu sacyjalnaj abarony nasielnictva.
Ukazam taksama praduhledžana pradaŭžeńnie pa 31 žniŭnia pieryjadu pradastaŭleńnia dziaržaŭnaj adrasnaj padtrymki ŭ vyhladzie štomiesiačnaj sacyjalnaj dapamohi hramadzianam, u jakich u mai-lipieni biahučaha hoda zakančvajecca termin dziejańnia takoj dapamohi.
Jašče adzin dakumient, padpisany siońnia Łukašenkam, — ukaz numar 179 «Ab apłacie pracy». Jon pryniaty ŭ metach pavyšeńnia ŭzroŭniu sacyjalnaj abaronienaści rabotnikaŭ biudžetnaj śfiery, a taksama zabieśpiačeńnia ŭstojlivaha funkcyjanavańnia biudžetnych arhanizacyj i asobnych (jakija znachodziacca za miažoj) ustanoŭ va ŭmovach pieraadoleńnia ŭ suśvietnaj i nacyjanalnaj ekanomikach nastupstvaŭ prociepidemičnych mier, jakija realizujucca.
Ukazam praduhledžvajecca padtrymańnie zarabotnaj płaty rabotnikaŭ biudžetnych arhanizacyj na ŭzroŭni nie nižejšym za pamier minimalnaj zarabotnaj płaty i ažyćciaŭleńnie im adpaviednych dapłat u vypadku vymušanaj niapoŭnaj zaniataści abo abjaŭleńnia prastoju.
U jakaści dadatkovaj mahčymaj krynicy finansavańnia raschodaŭ biudžetnych arhanizacyj u vypadku niedastatkovaści srodkaŭ ad dziejnaści, jakaja prynosić dachody, vyznačany srodki respublikanskaha i miascovych biudžetaŭ.