«Niesankcyjanavanaje mierapryjemstva». Niaviestu palitviaźnia Furmanava, jakaja haładaje kala SIZA, milicyja prosić syści
Da niaviesty Dźmitryja Furmanava, jakoha zatrymali dva miesiacy tamu ŭ Hrodnie padčas pikietu pa zbory podpisaŭ, haładajučaj u SIZA № 1 na Vaładarskaha, pryjšli milicyjanty. Razam ź dziaŭčynaj ciapier tam znachodzicca i hrupa padtrymki. Maładyja ludzi vyrašajuć, što rabić: bo supracoŭniki milicyi kažuć prysutnym, što haładoŭka i padtrymka — heta niesankcyjanavanaje masavaje mierapryjemstva, piša Tut.by.
Fota Vadzima Zamiroŭskaha
Ranicaj 4 žniŭnia da SIZA №1 na Vaładarskaha, dzie ŭžo bolš za tydzień znachodzicca Volha Karakina, pryjšli supracoŭniki milicyi.
— Nam skazali, što my ŭžo tut doŭha znachodzimsia i ŭsio heta vyhladaje jak pikiet. Pakul my źbirajem rečy i vyrašajem, što rabić. Nie vielmi chočacca padstaŭlać chłopcaŭ, jakija pryjšli padtrymać mianie — kaža Volha.
Jana raspaviadaje, što zaraz adčuvaje siabie nie vielmi dobra. Jość słabaść, bo dziaŭčyna haładaje z 26 lipienia.
Razam ź joj, nahadajem, haładoŭku pačynała i mama Dźmitryja Furmanava — Volha, ale pa stanie zdaroŭja była vymušana jaje spynić. Baćku-invalidu hetaha rabić nielha ź miedycynskich pryčyn.
Ciapier Karakina Volha miarkuje, što moža i spynić haładoŭku dziela taho, kab nikoha nie zatrymali. Ale pakul dakładna jašče ničoha nie vyrašyła.
Mama i baćka Furmanava ŭ minuły čaćvier źjechali ŭ Hrodna, u stalicy dziaŭčyna zastałasia adna.
Raniej baćka Furmanava raspaviadaŭ, što ab svajoj akcyi jany apaviaścili staršyniu Hrodzienskaha abłvykankama, kiraŭnika Administracyi prezidenta, kiraŭnika Savieta Respubliki, ministra ŭnutranych spraŭ, staršyni Śledčaha kamiteta, hienprakurora, kiraŭnika Viarchoŭnaha suda, a taksama pradstaŭnikoŭ ES i AAN u Biełarusi. Haładać žančyny płanavali biesterminova.
27 lipienia padtrymać siamju siabra svajoj inicyjatyŭnaj hrupy prychodziła kandydat na pasadu prezidenta Śviatłana Cichanoŭskaja. Taksama da žančynam pastajanna prychodziać nieabyjakavyja ludzi, jany prynosiać vadu, haračy čaj i padtrymlivajuć rodnych Dźmitryja Furmanava.
Nahadajem, kaardynatar inicyjatyŭnaj hrupy Śviatłany Cichanoŭskaj pa Hrodzienskaj vobłaści Dźmitryj Furmanaŭ byŭ zatrymany razam ź Siarhiejem Cichanoŭskim u Hrodnie 29 maja.
Jamu vystaŭlenyja abvinavačvańni pa č. 1 art. 342 (arhanizacyja hrupavych dziejańniaŭ, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady) KK. Biełaruskija pravaabaroncy pryznali Dźmitryja Furmanava, jak i inšych zatrymanych pa spravie Cichanoŭskaha, palitviaźniam.
Amnesty International nazvała Furmanava viaźniem sumleńnia.