Prezident Litvy prapanavaŭ płan urehulavańnia situacyi ŭ Biełarusi
Hitanas Naŭsieda na pachavańni Kastusia Kalinoŭskaha ŭ Vilni. Fota Nadziei Bužan
Prezident Litvy Hitanas Naŭsieda na pres-kanfierencyi 12 žniŭnia adreahavaŭ na padziei apošnich dzion u Biełarusi. Jon pradstaviŭ płan z 3 punktaŭ, jaki ŭrehulavaŭ by situacyju ŭ susiedniaj krainie, piša Delfi.lt.
Kiraŭnik krainy skazaŭ, što pierad pres-kanfierencyjaj razmaŭlaŭ z prezidentam Łatvii.
«Ja pavinien kanstatavać, što situacyja ŭ Biełarusi pa-raniejšamu turbuje, pa-raniejšamu lijecca kroŭ, ludziej pieraśledujuć, žurnalistaŭ zakryvajuć u turmy. My jak susiedzi razam ź inšymi krainami rehijonu šukajem sposaby vyrašeńnia hetaha kryzisu», — skazaŭ jon.
«Chaču pradstavić płan z 3 punktaŭ, jaki moža stać preludyjaj dla pasiarednictva prezidentaŭ krain rehijona ŭ vyrašeńni biełaruskaha kryzisu», — praciahnuŭ kiraŭnik krainy.
«Pa-pieršaje, dziaržaŭnyja orhany ŭłady pavinny spynić hvałt u dačynieńni da svaich hramadzian.
Pa-druhoje, biełaruskaja ŭłada pavinna adpuścić zatrymanych, ciapier viadoma pra tysiačy zatrymanych.
I treci punkt — Biełaruś pavinna adnavić dyjałoh z hramadzianskaj supolnaściu», — skazaŭ Naŭsieda.
Jon zaŭvažyŭ, što asnova dla dyjałohu — farmiravańnie nacyjanalnaj rady z pradstaŭnikoŭ ułady i hramadzianskaj supolnaści. «Heta rada pavinna zaniacca pošukam rašeńniaŭ i vychadu z kryzisu», — skazaŭ Naŭsieda.
«Kali hetyja punkty pasłužać pačatku dyskusii, to razam sa mnoj pasiaredničać u vyrašeńni hetaj situacyi pahodziacca taksama prezidenty Łatvii i Polščy», — praciahnuŭ jon.
Naŭsieda skazaŭ, što prablemu treba vyrašać mirnym šlacham, ale jość i inšy šlach. «Dumaju, my tak pavinny dziejničać — pačać sa sposabu pošuku rašeńnia mirnym šlacham i imknucca vyrašyć prablemu najmienš balučym sposabam.
Ale kali hetaja inicyjatyva nie budzie pryniataja, viadoma ž, moža być tak, što zastanucca inšyja alternatyvy, pra jakija zaraz havorać i ŭ Litvie, i ŭ ES.
Ja kažu ŭ tym liku i pra sankcyi — jak na ŭzroŭni ES, tak i pra nacyjanalnyja», — praciahnuŭ prezident.
Jon padkreśliŭ, što ŭ pieršuju čarhu prapanujecca mirnaje vyrašeńnie prablemy. Kali spatrebicca, potym piarojduć da inšych.