Žychar Minska, zatrymany 9-ha: Mianie zavieźli ŭ budynak na Kamsamolskaj, bili elektrašokieram. A na Akreścina nas było pa 5 čałaviek na adny nary
Minčuk Pavieł Čuduk udzielničaŭ u mirnaj akcyi pratestu suprać falsifikacyi vybaraŭ, što adbyvałasia ŭ noč paśla vybaraŭ z 9 na 10 žniŭnia.
«Ja išoŭ u bok Kirava, na vakzał, razam z hrupaj maładzionaŭ, — raskazaŭ Pavieł Čuduk Našaj Nivie. — Nas było 7-8 čałaviek, my prosta išli, ničoha nie skandavali. Da nas padjechała niekalki aŭtobusaŭ, adtul vyskačyli ludzi ŭ cyvilnym z krykam: «S*ki, mrazi, na ziemlu!».
My pabiehli. Kahości schapili adrazu i zaciahnuli ŭ aŭtobus. Mianie schapili i kinuli tvaram ab ziamlu, nadzieli kajdanki. Pavieźli na Kamsamolskuju.
Tam byŭ niejki budynak 4-paviarchovy, typu štaba ichnaha. Zaviali ŭ niejki pakoj i pakłali tvaram na padłohu. Paśla supracoŭnik milicyi ŭziaŭ elektrašokier i piać razoŭ zapar prajšoŭsia pa nyrkach. Heta praciahvałasia try chviliny bieź pierapynku.
Paśla jon skazaŭ: «Ustavaj, s*ka!» A ja nie mahu, u mianie nie ruchajucca kaleni. Tady jon mianie adnoj rukoj pryŭźniaŭ i pasadziŭ na kresła. Pytaŭsia: «Nu što, s*ka, dabiehaŭsia? Varta jano taho było?»
Ja maŭčaŭ. Paśla mianie pasadzili ŭ aŭtazak i pavieźli ŭ CIP na Akreścina. U dvary na kaleniach i tvaram da ściany nas stajała kala 100 čałaviek.
Stajali niekalki hadzin u roznych pozach, jakija nam zahadvali. Prykładna pałovu z nas vielmi mocna źbivali. Uvieś čas danosilisia kryki: «Oj, aj, nie treba!»
Ja chacieŭ zirnuć, što adbyvajecca, ale atrymaŭ dubinkaj. «Chutkuju» dla tych, chto atrymaŭ najciažejšyja ranieńni, puskać nie chacieli. Pryvieźli jašče z sotniu čałaviek, ale ich nie było kudy stavić i tamu pavieźli ŭ niejkaje inšaje miesca.
Paśla nas zaviali ŭ kamieru. Na dziesiać mietraŭ, adzin kran z vadoj i adnu prybiralniu nas było 25 čałaviek. Na łožku siadzieła pa 5 čałaviek. My sprabavali pa čarzie spać.
Ježy nie było nijakaj. Ja prasiadzieŭ da 17 hadzin i paśla mianie adpuścili na volu čakać suda za ŭdzieł u niesankcyjanavanaj akcyi».
(Fota Paŭła Čuduka jość u Redakcyi Našaj Nivy)