Dva supracoŭniki MZS vyjšli na pikiet na prystupki viedamstva
Fota Źmitra Pankaŭca
17 žniŭnia na prystupkach hanka MZS adzinočny pikiet zładziŭ rabotnik centralnaha aparatu viedamstva Viačasłaŭ Kazačonak. Mužčyna nie dypłamat, nie dziaržsłužačy, a načalnik historyka-archiŭnaha adździaleńnia MZS. Da jaho dałučyłasia namieśnik načalnika ŭpraŭleńnia Jeŭrazijskaj intehracyi Alena Kopanieva, piša Tut.by.
Viačasłaŭ Kazačonak kaža, što vyrašyŭ takim čynam «vykazać svaju pryncypovuju pazicyju». Jon adznačaje, što jamu nichto nie płaciŭ, nie pahražaŭ, nie prymušaŭ.
— Skažu adrazu — mnie strašna. Za našu budučyniu, žyćcio ludziej, svajo žyćcio… Biełaruś 21 stahodździa. Strašny son, ad jakoha chočacca pračnucca… Kala steły Minsk — horad-hieroj i muzieja Vialikaj Ajčynnaj vajny svaje bratki-biełarusy, vartavyja paradku i zakonnaści, varvarsku bjuć i rasstrelvajuć ludziej, a ŭ zaścienkach na vulicy, jakaja nosić imia frantavika, jaki addaŭ žyćcio za našu svabodu i lepšuju budučyniu, Hieroja Savieckaha Sajuza Barysa Akreścina, katujuć i katujuć. I heta nie hiestapa i SD časoŭ vajny, nie palicai… Ja — darosły zdarovy mužyk — rydaŭ viečarami ad apoviedaŭ ludziej, jakija pieražyli katavańni, — kaža Viačasłaŭ.
Mužčyna zaklikaje siłavikoŭ nie bić lažačych, biezdapamožnych, dziaciej, žančyn i starych, pamiatać pra honar i sumleńnie.
— Budźcie z narodam, spynicie, kali łaska, hienacyd. Vyzvalicie ludziej z zaścienkaŭ, dajcie im mieddapamohu.
Źviarnuŭsia jon i da prezidenta: «Nu čamu nie trymajecie svajo słova i nie sychodzicie z partfielem pad pachaj? Daŭno i bieznadziejna adarvalisia ad narodu».
Jon zaklikaje da rasśledavańnia «ŭsich faktaŭ biezzakońnia, sudovaha samavolstva, u tym liku ŭ raniejšyja hady, i prymianieńnia siły i represij suprać mirnych hramadzianaŭ».
Mužčyna dapaŭniaje, što jon lubić svaju pracu, zbroju, bojeprypasy, narkotyki doma nie zachoŭvaje, hrošaj za kanapaj taksama, chabaru nie braŭ, mietadyčki nie čytaŭ, zakonapasłuchmiany hramadzianin.
— U adroźnieńnie ad ambasadara ŭ Słavakii Laščeni ja znachodžusia ŭ Minsku. Prašu ŚMI sačyć za maim losam, — kaža Viačasłaŭ.
Siońnia pierad pikietam Viačasłava, pra jaki jon papiaredziŭ svaich kaleh, kiraŭnik MZS Uładzimir Makiej sabraŭ usich supracoŭnikaŭ na razmovu. Makiej nahadaŭ, što supracoŭniki MZS davali prysiahu dziaržavie i, pa słovach supracoŭnikaŭ, namiaknuŭ na toje, što kali chtości nie zhodny z palitykaj dziaržavy, jon pavinien napisać zajavu.