«Vyjdzie Siaroža i vybaraŭ nie budzie». Łukašenka raskazaŭ, navošta, na jaho dumku, Cichanoŭskaja idzie va ŭładu
Fota pres-słužby
Pra heta raspavioŭ Alaksandr Łukašenka ŭ čas vizitu na MZKC. Siužet byŭ pakazany ŭ viačernim vypusku navin na ANT, piša Tut.by
Rabočyja nahadali Łukašenku, što, pavodle aficyjnych źviestak, jaho nie padtrymali kala 700 tysiač čałaviek: «Heta vialikaja siła, ź imi treba razmaŭlać».
Łukašenka pahadziŭsia, ale tut ža zahavaryŭ pra Cichanoŭskuju i tym, što dziela jaje hatovyja kinuć pieršaha prezidenta. Na zaŭvahu rabočaha, što prezidenty pavinny mianiacca, jak i rabočyja — źmienu adpracavaŭ i syšoŭ, Łukašenka adkazaŭ:
— Kali prezident budzie ŭ vas paźmienna pracavać, truba vam.
Jon staŭ havaryć, što z krainaj stvaryli nieviadoma što, i znoŭ uzhadaŭ Cichanoŭskuju:
— Česnyja i niačesnyja vybary [skazaŭ pa-biełarusku — NN]… «Potym ja pryjdu praviadu česnyja», — pracytavaŭ Łukašenka. — Pieramahła. Što budzie nastupnym jaje krokam? Voś padumajcie. A jany skazali — vypuścić palitviaźniaŭ. Čamu? Tam ža Siaroža siadzić (Siarhiej Cichanoŭski). Vyjdzie Siaroža adtul i nijakich paŭtornych vybaraŭ nie budzie. Rulić budzie jon, jana budzie začytvać. Nu što my — idyjoty, hetaha nie razumiejem?
Łukašenka zajaviŭ, što viedaje ŭsie hetyja technałohii.
— I navat Vićku Babaryku nichto nie vypuścić, bo jon užo potym im budzie zaminać.
Pakazali i ŭryvak z razmovy Łukašenki z žančynaj. Joj jon paabiacaŭ «prybrać patrulavańnie voś hetych u čornych kašulach», ale paprasiŭ potym na jaho nie kryŭdzicca.
— Šachraj, prybrać usich vajennasłužačych z Uručča, — rasparadziŭsia jon.