Jarmošyna nie vieryć, što ŭ Rakavie niapravilna paličyli hałasy na vybarach
Žycharam Rakaŭskaha sielsavieta amal praz dva miesiacy paśla vybaraŭ pryjšoŭ adkaz ad Centralnaj vybarčaj kamisii: Lidzija Jarmošyna ličyć, što «dakładnych danych, jakija pakazvajuć na niapravilny padlik hałasoŭ u Rakavie, niama», piša rakau.by.
Nahadajem, 9 žniŭnia 2020 hoda na dźviarach Rakaŭskaha ŭčastka dla hałasavańnia №19 byŭ vyviešany vynikovy pratakoł učastkovaj kamisii, zhodna ź jakim Śviatłana Cichanoŭskaja nabrała 84 hałasy, a Alaksandr Łukašenka - 1426.
Žychary Rakava i susiednich viosak, niazhodnyja z takimi vynikami hałasavańnia, inicyjavali kalektyŭny zvarot u prakuraturu Vałožynskaha rajona. Pad zvarotam padpisalisia 227 hramadzian, jakija hałasavali za Cichanoŭskuju, i paprasili prakurora rajona pravieryć, čamu ŭ pratakole ŭčastkovaj kamisii hałasoŭ za kandydata Cichanoŭskuju značna mienš.
Prakuratura pieranakiravała zvarot u Centralnuju vybarčuju kamisiju, jakaja doŭha maŭčała, ale ŭsio ž taki vysłała žycharam Rakava adkaz.
U adkazie CVK staić podpis Lidzii Jarmošynaj i havorycca, što sabranyja ŭ Rakavie podpisy nijak nie dakazvajuć, što hałasy na Rakaŭskim učastku dla hałasavańnia №19 byli paličanyja niapravilna:
«U Centralnaj kamisii Respubliki Biełaruś pa vybarach i praviadzieńni respublikanskich refierendumaŭ razhledžana zajava, jakaja pastupiła z prakuratury Vałožynskaha rajona Minskaj vobłaści ad imia žycharoŭ Rakaŭskaha sielsavieta ab niedakładnaści dadzienych pratakołu ab vynikach hałasavańnia na ŭčastku dla hałasavańnia № 19 Vałožynskaha rajona.
Tłumačym, što ŭ adpaviednaści z Vybarčym kodeksam Respubliki Biełaruś ustanaŭleńnie vynikaŭ hałasavańnia na ŭčastku dla hałasavańnia ažyćciaŭlajecca ŭčastkovaj kamisijaj vyklučna na padstavie śpisu vybarščykaŭ i biuleteniaŭ, jakija znachodziacca ŭ skryniach dla hałasavańnia. Kodeksam nie praduhledžany takija krynicy infarmacyi ab vynikach hałasavańnia hramadzian, jak sabranyja pa inicyjatyvie kaho-niebudź ź ich paśla vybaraŭ podpisy. Akramia taho, harantyj taho, što vybarščyki pry ich apytańni prychilnikami adnaho z kandydataŭ pakazali svoj sapraŭdny vybar, nie majecca. Samo apytańnie nie ŭzhadniajecca z pryncypam tajnaha hałasavańnia, ustanoŭlenym vybarčym zakanadaŭstvam.
Takim čynam, dakładnych źviestak, jakija pakazvajuć na niapravilny padlik hałasoŭ na ŭčastku dla hałasavańnia, niama».
Darečy, źviestki płatformy «Hołas» na Rakaŭskim učastku dla hałasavańnia №19 taksama nie supadajuć ź ličbami aficyjnaha pratakołu: 384 vybarščyki adznačyli, što jany hałasavali za Śviatłanu Cichanoŭskuju, ź jakich 229 čałaviek paćvierdzili svoj vybar fatahrafijami biuleteniaŭ.