27-hadovaja minčanka druhi raz zachvareła na karanavirus
U Biełarusi imkliva raście kolkaść chvorych na karanavirus. Za apošnija sutki aficyjnaja statystyka daje plus 845 vypadkaŭ. Pryčym niekatoryja ludzi chvarejuć paŭtorna.
Maryi Kisialovaj 27 hod. Pieršy raz dziaŭčyna zachvareła ŭ mai. Miarkuje, što zaraziłasia na pracy — u kalehi za piać dzion da hetaha paćvierdziŭsia karanavirus.
Fota z asabistaha archivu
«Bolš nie było dzie padčapić. Tady ja prytrymlivałasia sacyjalnaj dystancyi, amal nie była ŭ kramach, usio zamaŭlała pa dastaŭcy. Na pracu i nazad jeździła na mašynie», — raskazvaje dziaŭčyna.
U pieršyja dni chvaroby ŭ jaje padniałasia tempieratura da 38 hradusaŭ, pačaŭsia kašal. Maryja vyklikała doktara.
«Mnie dva tydni nie chacieli rabić test. Ja chadziła raz na niekalki dzion, jak zvyčajna pry prastudzie, u palikliniku.
Mnie spačatku pryznačyli adzin antybijotyk, potym druhi, potym treci — i ničoha nie dapamahała. Tempieratura ŭsio adno była, tolki źniłasia da 37,5. Schadzić u palikliniku i nazad było fizična ciažka. Ceły dzień chaciełasia spać, nie było sił», — uspaminaje Maryja.
Kali mazok narešcie ŭziali, sumnievaŭ nie zastałosia — karanavirus. Dziaŭčynie taksama rabili renthien, kab vyklučyć pnieŭmaniju. Ahułam na balničnym minčanka praviała 40 dzion. Ale i paśla chvaroby siły viarnulisia nie adrazu. Niekalki tydniaŭ dziaŭčyna starałasia abmiažoŭvać fizičnuju aktyŭnaść.
Maryja paźniej stała donaram płazmy: ubačyła abjavu na sajcie 6-j balnicy i zapisałasia. Antycieły jana zdavała čatyry razy, apošni — miesiac tamu.
Pra karanavirus jana nie ŭspaminała, pakul u piatnicu 16 kastryčnika znoŭ nie adčuła znajomyja simptomy — tempieratura 37,5, kašal, słabaść. Niekalki dzion Maryja drenna adčuvała smak.
«Spačatku padumała: vosień, usio moža być, što VRVI. Paśla vychodnych źviarnułasia ŭ palikliniku. Doktarka skazała, što niama testaŭ u najaŭnaści, chočacie — rabicie sami. Bolš dla samazaspakajeńnia ja ŭ piatnicu źjeździła ŭ pryvatnuju łabaratoryju i zdała ekspres-test na antycieły».
Ekspres-test pakazvaje, ci jość u kryvi imunahłabuliny M i G. Pieršyja śviedčać pra toje, što ŭ arhaniźmie śviežaja infiekcyja. Druhija — što ŭ adkaz na karanavirus vypracavalisia antycieły (ale jak daŭno, nieviadoma). U Maryi vyjavili abodva vidy imunahłabulinaŭ.
«Kali zdavała test, ja padpisvała pahadnieńnie, što, kali ŭ mianie znojducca antycieły M, jakija pakazvajuć, što ty chvareješ u ciapierašni čas, łabaratoryja pieradaść maje dadzienyja sanstancyi i paliklinicy».
Maryja adznačaje, što adčuvaje siabie lepš, čym u minuły raz. Jana jašče praciahvaje lačeńnie.