Biskup Juryj Kasabucki zaklikaŭ malicca za paciarpiełych, źbitych i paranienych
Katalicki biskup, dapamožny biskup Minska-Mahiloŭskaj archi-dyjaczeii Juryj Kasabucki apublikavaŭ u svaim fejsbuku zvarot.
catholic.by
«Darahija maje siabry! Boh daŭ nam vielmi mocnuju i dziejsnuju zbroju — dar malitvy. My vielmi šmat molimsia za našu Baćkaŭščynu, asabliva ŭ hety składany pieryjad.
Chtości navat byŭ pakarany za svaju malitvu, trapiŭšy za kraty albo atrymaŭšy štraf, bo kamuści nie spadabałasia miesca malitvy.
Toje, što adbyvajecca ŭ našaj krainie, śviedčyć ab nieabchodnaści ŭzmocnić našu malitvu, nie spyniać jaje i nie bajacca ciažkaściaŭ.
Siońnia [u niadzielu] naš narod atrymaŭ čarhovuju porcyju nasilla i žorstkaści z boku «pravaachoŭnikaŭ», mnohich brutalna zatrymlivali i kinuli za kraty. Ja zaachvočvaju malicca za ŭsich paciarpiełych, źbitych, paranienych…
Pierš za ŭsio, kab kryŭda i bol nie pieraraśli ŭ nianaviść i ahresiju, žadańnie pomsty… Kab usie my zmahli zachavać svaju ČAŁAVIEČUJU hodnaść, salidarnaść, nieabyjakavaść, kab u hetyja chviliny vyprabavańniaŭ my padtrymlivali adno adnaho i adčuvali siabie adnym narodam.
Ja zaachvočvaju malicca taksama za tych, chto daje i vykonvaje złačynnyja zahady, daje niespraviadlivyja prysudy… My asudžajem nasille, chłuśniu, niespraviadlivaść, ale molimsia za kožnaha čałavieka, navat kali bačym, što jaho serca napoŭniena złom i nianaviściu. Takomu čałavieku najbolš patrebna Božaja łaska dla zrazumieńnia peŭnych rečaŭ i pakajańnia…
«MOLIMSIA ZA NAŠU RODNUJU BIEŁARUŚ I ZA NAŠ CUDOŬNY NAROD!!!», — zakančvaje biskup Juryj Kasabucki.