Žychara Hrodna, jaki raspyliŭ haz na «čałavieka ŭ cyvilnym», asudzili na 4 hady ŭ kałonii-pasialeńni
Sud Kastryčnickaha rajona Hrodna vynies vyrak Mikicie Samarynu, jaki adbivaŭ čałavieka pry zatrymańni i raspyliŭ haz u nieviadomaha ŭ cyvilnym adzieńni. Jon pakarany abmiežavańniem voli z nakiravańniem u kałoniju-pasialeńnie. Taksama jon maje apłacić 500 rubloŭ kampiensacyi maralnaj škody milicyjantu, piša Radyjo Svaboda.
Mikitu vyzvalili ŭ zale suda. Dva miesiacy jon znachodziŭsia pad vartaj.
29-hadovaha Samaryna pryznali vinavatym u hvałcie ŭ dačynieńni da milicyjanta Siarhieja Bilidy, jakija zatrymlivaŭ čałavieka.
Jon svaju vinu nie pryznaŭ. Ź jahonych słovaŭ, jon nie viedaŭ, što pierad im milicyjant, naŭmysna nie chacieŭ jamu naškodzić.
Incydent adbyŭsia 25 žniŭnia. Pa darozie z pracy ŭ centr horada zatrymali niekalki dziasiatkaŭ rabotnikaŭ «Hrodna Azot». Pad izalatar pryjšli kala paŭtysiačy haradziencaŭ, kab ich padtrymać. Ludzi mirna stajali i čakali vyzvaleńnia rabotnikaŭ. Kali ŭsich vypuścili i natoŭp razyšoŭsia, u dvarach «ludzi ŭ cyvilnym» pačali chapać haradziencaŭ. Padčas adnaho z hetych zatrymańniaŭ niechta puściŭ haz.