U Homielskim rajonie byłoha milicyjaniera pakarali štrafam za bieł-čyrvona-biełyja ściahi
Ułada ličyć, što jon «nie padtrymlivaŭ u naležnym stanie znadvorny vyhlad žyłoha domu». «Dla mianie bieł-čyrvona-bieły ściah — heta symbal Chrysta, čyścini i pralitaj Chrystom kryvi za nas», — kaža na heta Michaił Rusak, piša Radyjo Svaboda.
11 śniežnia administracyjnaja kamisija Homielskaha rajvykankamu pakarała pensijanera MUS Michaiła Rusaka štrafam u 405 rubloŭ (15 bazavych vieličyniaŭ) za toje, što jon «nie padtrymlivaŭ u naležnym stanie znadvorny vyhlad žyłoha domu».
Tak staršynia sielsavietu traktavaŭ vyviešany na domie biełaruski bieł-čyrvona-bieły ściah.
Pratakoł pavodle artykułu 21.13 Kodeksu ab administracyjnych pravaparušeńniach na byłoha milicyjanta skłaŭ staršynia Čonkaŭskaha rajvykankamu. Pavodle pratakołu, Michaił Rusak parušyŭ zakanadaŭstva tym, što «nie zrabiŭ naležnych zachadaŭ dla padtrymańnia ŭ naležnym stanie znadvornaha vyhladu žyłoha domu dy inšych zbudavańniaŭ, a mienavita raźmiaściŭ na dachu zbudavańnia i fasadzie žyłoha domu niezarehistravanuju symboliku (bieł-čyrvona-biełyja ściahi)».
Michaił na pratakole napisaŭ svaje zaŭvahi, u tym liku što infarmacyja ŭ pratakole «zaviedama iłžyvaja». Pensijaner MUS pravioŭ siarod pradstaŭnikoŭ ułady i milicyi tłumačalnuju pracu, spasyłajučysia na encyklapedyi i daviedki z Nacyjanalnaj akademii navuk, što takoje «fasad budynku», «architekturnyja zbudavańni i kanstrukcyi», «zarehistravanaja i niezarehistravanaja symbolika».
«Na kamisii suprać mianie zasiadali až dzieviać čałaviek, u tym liku padpałkoŭnik milicyi. Jany ŭsie, jak ja liču, ŭčynili dziejańni, jakija supiarečać spraviadlivaści i zakonnaści, vykanali złačynnyja zahady. Ja patrabavaŭ dakazać, čamu hetaja symbolika nie zarehistravanaja, ale adkazu nie pačuŭ. Dzieviać čałaviek bolš za hadzinu raźbiralisia z hetym pytańniem», — zaznačyŭ Michaił.
Jon nia viedaje pakul, ci budzie abskardžvać rašeńnie:
«Kamu skardzicca, kali za zabojstvy nie raspačynajuć spravy? Usia systema kiravańnia ŭ dziaržavie prasiaknutaja ducham śmierci», — dadaŭ pensijaner.
Jašče ŭ vieraśni jon kupiŭ bieł-čyrvona-bieły ściah, tronak da jaho i pastaviŭ symbal na svaim dvary. Nieŭzabavie nočču nieviadomyja złamali tronak i skrali ściah. Jon pastaviŭ novy. U listapadzie pradstaŭniki ŭłady pierajšli da «siłavoha varyjantu» vyrašeńnia kanfliktu. Da Michaiła pryjechali kala dvaccaci čałaviek — u tym liku pradstaŭniki milicyi, sielsavietu, kamunalniki. Jany zajšli na pryvatnuju terytoryju, niahledziačy na zabaronu haspadara, i źniali bieł-čyrvona-biełyja ściahi.
«Dla mianie bieł-čyrvona-bieły ściah — heta symbal Chrysta, čyścini i pralitaj Chrystom kryvi za nas», — kaža Michaił.