U dvary na Puškinskaj zatrymali ludziej, kali tyja vyjšli ŭpryhožvać dvor. Jany atrymali da 25 sutak
Uviečary 10 śniežnia miascovyja žychary damoŭ tavarystva ŭłaśnikaŭ «Puškinskaje» sabralisia ŭ siabie ŭ dvary na Alšeŭskaha, kab upryhožyć dvor da Novaha hoda. U momant raźviešvańnia hirlandy pryjechali dva čornyja busy, ź ich vyjšli ludzi ŭ čornym i zatrymali šeść mužčyn, paabiacaŭšy adpuścić ich paśla razmovy. Mužčyn nie adpuścili. A 11 śniežnia zatrymanym dali ad 10 da 25 sutak, piša Tut.by.
Miascovyja žychary raspaviadajuć, 10 śniežnia jany, jak zvyčajna, sabralisia ŭviečary ŭ dvary pamiž damami na Alšeŭskaha, 1A i 1B, na čajavańnie, u hety raz vyrašyli ŭpryhožyć dvor mišuroj i hirlandami, jałovymi halinkami da Novaha hoda. Na placoŭcy było 15-20 čałaviek. Surazmoŭcy nie raz u razmovie tłumačyli: mišura była roznych koleraŭ, hirlanda — tolki biełaha koleru.
— Na čajavańni ŭ nas nikoli niama nijakaj simvoliki, bo ŭ naša pieršaje čajavańnie vosieńniu da nas pryjechaŭ taki ž narad AMAPa, tady da nas padyšoŭ tolki adzin milicyjanier u formie i spytaŭ, što my robim. Jon ahledzieŭ naš stoł, pierakanaŭsia, što niama ałkaholu, simvoliki i skazaŭ: «Možacie źbiracca ŭ svaim dvary i rabić što chočacie, hałoŭnaje, kab nie było simvoliki i łozunhaŭ», — raspaviadaje miascovy žychar Michaił.
Pavodle jaho słoŭ, paśla hetaha ludzi źbiralisia ŭ dvary nie raz. 10 śniežnia, jak tolki mužčyny paviesili hirlandu, u dvary źjavilisia siłaviki — z pryparkavanaha busa vyjšli kala 15 čałaviek, niekatoryja ź miascovych vyrašyŭ uciačy, niekatoryja zastalisia na miescy.
— Ludzi ŭ čornaj formie nie pradstaŭlalisia i nie kazali, što jany ź milicyi. Skazali: «Projdziemcie z nami, tam my vam usio patłumačym». Jany brali vypadkovych mužčyn i spakojna advodzili, nichto nie supraciŭlaŭsia, mužčyny spakojna pajšli, — raspaviadaje Michaił. Tak siłaviki paviali z saboj šeść čałaviek.
Paśla hetaha susiedzi pabiehli da Frunzienskaha RUUS, jakoje znachodzicca niedaloka — praz darohu.
Adna z tych, chto byŭ la RUUS, — Darja. Jana raspaviadaje, što pieršapačatkova siłaviki skazali, što pahavorać z mužčynami i potym ich adpuściać, ale pad RUUS praz try hadziny čakańnia rodnym i susiedziam zatrymanych mužčyn skazali, što ich paviazuć na Akreścina, bolš nijakaj infarmacyi nie davali.
— Siarod zatrymanych absalutna stanoŭčyja mužčyny: pradprymalniki, biznesmieny, baćka dvaich dziaciej małodšaha školnaha ŭzrostu, adzin ź ich niadaŭna pieražyŭ apieracyju, što zusim patrabuje chatniaha spakoju, — kaža miascovaja žycharka Darja, jakaja razam z usimi ŭpryhožvała dvor.
Pa słovach surazmoŭnicy, pakul jany stajali pad RUUS, zaŭvažyli, što praź niejki čas da budynka padjechaŭ toj ža samy bus, adkul vyvieli čatyroch mužčyn.
— Paźniej my daviedalisia, što na Kazimiraŭskaj byli zatrymańni z takoj samaj pryčynaj. Potym pryjechali pad RUUS ich žančyny i raspaviali nam praktyčna takuju ž historyju, jak i ŭ nas: prosta zatrymali za toje, što ludzi byli na vulicy. My dumajem, što heta byŭ niejki rejd.
Darja raskazvaje, siońnia stała viadoma, što nad zatrymanymi susiedziami prajšoŭ sud. Adnaho z mužčyn asudzili pa dvuch artykułach — 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ) i 23.4 (Niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni słužbovych paŭnamoctvaŭ), u vyniku jon atrymaŭ 20 sutak.
Jašče dvoje atrymali pa 12 sutak, adzin čałaviek — 10 sutak, jašče adzin — 14, šostamu zatrymanamu dali 25 sutak.