Sud nad Maksimam Dašukom pieranieśli
Abnoŭlena, dadałosia videa
Nibyta zachvareŭ adzin z narodnych zasiadalnikaŭ. Datu novaha suda nie pryznačyli.
Siońnia, u dzień abarony pravoŭ dziaciej, musiŭ pačacca sud nad niepaŭnaletnim udzielnikam «Pracesu čatyrnaccaci» Maksimam Dašukom. Adnak z-za chvaroby adnaho z narodnych zasiadalnikaŭ praces pieranieśli na niavyznačany termin. Padtrymać chłopca da budynka Maskoŭskaha suda pryjšło bolš za tryccać čałaviek -- paplečniki, pravaabaroncy.
***
Suprać Maksima Dašuka była zaviedzienaja kryminalnaja sprava pavodle art. 415 KK («Uchileńnie ad adbyvańnia pakarańnia ŭ vyhladzie abmiežavańnia voli»). U traŭni letaś Maksim byŭ asudžany na paŭtara hodu abmiežavańnia voli biez nakiravańnia ŭ śpieckamiendatury, tak zvanaj «chatniaj chimii».
Praz svoj uzrost i adsutnaść minskaj prapiski chłopiec tak i nie zmoh uładkavacca na pracu, tamu faktyčna znachodziŭsia pad chatnim aryštam. Z domu jamu dazvalałasia vychodzić tolki na dźvie hadziny ŭ sutki — ad dziesiataj da dvanaccataj ranicy.
Viasnoj u Maksima pamior baćka, tamu jamu časta davodziłasia dapamahać maci, jakaja pracuje pradprymalnicaj. Milicyjanty vynieśli Dašuku čatyry papiaredžańni. Adnu noč chłopiec pravioŭ u śledčym izalatary, paśla čaho prakuror pamianiaŭ mieru strymańnia na padpisku ab niavyjeździe.
U pačatku traŭnia mižnarodnaja pravaabarončaja arhanizacyja Amnesty International pryznała fihurantaŭ «spravy 14‑ci» viaźniami sumleńnia.