Siońnia adznačajecca Mižnarodny dzień abarony dziaciej
1 červienia — Mižnarodny dzień abarony dziaciej. Jon zasnavany ŭ listapadzie 1949 hoda rašeńniem siesii Mižnarodnaj demakratyčnaj fiederacyi žančyn. Pieršy Mižnarodny dzień abarony dziaciej byŭ praviedzieny ŭ 1950 hodzie.
1 červienia — Mižnarodny dzień abarony dziaciej. Jon zasnavany ŭ listapadzie 1949 hoda rašeńniem siesii Mižnarodnaj demakratyčnaj fiederacyi žančyn. Pieršy Mižnarodny dzień abarony dziaciej byŭ praviedzieny ŭ 1950 hodzie.
Fota Andreja Lankieviča
Jak zajaviŭ u intervju BiełaPAN kaardynatar prahramy «Abarona pravoŭ dziaciej» Dziciačaha fondu AAN (JUNISIEF) Alaksandr Karankievič, Mižnarodny dzień abarony dziaciej — heta napaminak darosłym ab nieabchodnaści vykonvać pravy dziaciej na žyćcio, na svabodu mierkavańnia i relihii, na adukacyju, adpačynak i volny čas, na abaronu ad dyskryminacyi, fizičnaha i psichałahičnaha nasilla, na abaronu ad ekspłuatacyi.
Nahadajem, u 1959 hodzie AAN pryniała Dekłaracyju pravoŭ dziciaci. 20 listapada 1989 hoda Hienasambleja AAN zaćvierdziła Kanviencyju ab pravach dziciaci, jakuju padpisała 191 kraina. Hety dakumient źjaŭlajecca adnym z pryznanych mižnarodnych pahadnieńniaŭ pa pravach čałavieka.
13 lipienia 1990 hoda Kanviencyja była ratyfikavana ŭ SSSR. Adnym ź pieršych mižnarodnych aktaŭ, da jakich dałučyłasia niezaležnaja Biełaruś, stała Kanviencyja ab pravach dziciaci (1991 hod), na asnovie jakoj pryniaty zakon «Ab pravach dziciaci» (1993 hod) — pieršy ŭ krainach SND. Biełaruś dałučyłasia da fakultatyŭnych pratakołaŭ Kanviencyi ab pravach dziciaci, jakija tyčacca ŭdziełu dziaciej va ŭzbrojenych kanfliktach, a taksama handlu dziećmi, dziciačaj prastytucyi i dziciačaj parnahrafii.
Ciapier u krainie žyvie bolš jak 1.785.387 dziaciej.
Surjoznaj prablemaj u Biełarusi źjaŭlajecca sacyjalnaje siroctva, padkreśliŭ Alaksandr Karankievič. Ahulnaja kolkaść dziaciej, jakija vychoŭvajucca ŭ dziaržaŭnych internatnych ustanovach, na kaniec 2002 hoda była 28.664 čałavieki, a ŭ 2008-m — 22.467. Pry hetym kolkaść dziaciej-sirot i dziaciej, jakija zastalisia biez apieki baćkoŭ, jakija znachodziacca na poŭnym dziaržaŭnym zabieśpiačeńni ŭ dziciačych internatnych ustanovach, u 2002 hodzie była 11.272 čałavieki, a ŭ 2009-m — 8.924.
Ciapier u Biełarusi funkcyjanujuć 135 dziciačych internatnych ustanoŭ, u tym liku 10 damoŭ dziciaci dla dziaciej da troch hadoŭ.
Funkcyi abarony pravoŭ i intaresaŭ dziciaci ŭ Biełarusi ažyćciaŭlajuć orhany apieki i papiačycielstva miascovych vykankamaŭ i administracyj, siektary achovy dziacinstva ŭ adździełach adukacyi, kamisii pa pravach niepaŭnaletnich. U krainie taksama pracuje Nacyjanalnaja kamisija pa pravach dziciaci i jaje pryjomnyja ŭ rehijonach. Jak paviedamili BiełaPAN u pryjomnaj Nacyjanalnaj kamisii pa pravach dziciaci, tam razhladajuć vusnyja i piśmovyja paviedamleńni hramadzian, u tym liku dziaciej, pa sacyjalna-piedahahičnych pytańniach. Za apošnija dva hady pracy ŭ Nacyjanalnuju kamisiju pastupiła bolš jak 200 piśmovych zvarotaŭ pa pravach dziciaci.