Na hamialčanku skłali pratakoł za fotazdymak z partyjnym ściaham
U siamji Vadzima Vasiljeva i Natalli Juškinaj adbyŭsia ahlad kvatery supracoŭnikami AUS Savieckaha rajona, u milicyi na Natallu skłali pratakoł pa art. 23.34 KaAP za fotazdymak la haradskoj jalinki sa ściaham BSDP (siamiejnaja para — siabry hetaj partyi), piša «Homielskaja viasna».
U abiedzieny čas na vulicy Barykina Natallu Juškinu spynili dva amapaŭcy i i pavieźli jaje dadomu, dzie ŭžo znachodziŭsia ŭčastkovy ich rajona. Paźniej da jaho dałučylisia dva supracoŭniki ŭ cyvilnym. Joj pakazali pastanovu na ahlad kvatery ŭ suviazi z repostam, jaki Natalla zrabiła ŭ telehramie: jana padzialiłasia fotazdymkam, dzie jana z mužam sfatahrafavalisia sa ściaham BSDP. Padčas ahladu supracoŭniki zabrali dva telefony siamiejnaj pary i sistemny błok kampjutara.
«Padčas dopytu jany mnie pahražali, što nas z mužam źmieściać u izalatar, a našych małych dziaciej zabiaruć sacyjalnyja słužby, — sa ślazami na vačach raspaviadaje Natalla. — Taksama dakarali, čamu ja dapamahaju, pišu palitźniavolenym (jany znajšli ŭ mianie ŭ telefonie paštoŭku ad Siarhieja Cichanoŭskaha), a nie dzieciam-sirotam u prytułkach».
Padčas składańnia pratakoła Natalla Juškina sprabavała patłumačyć milicyjanieru, što BSDP — lehalnaja biełaruskaja partyja, i jana maje prava fatahrafavacca z atrybutykaj svajoj partyi. Ale hetaja arhumientacyja nie paŭpłyvała na rašeńnie milicyjaniera skłaści pratakoł ab administracyjnym pravaparušeńni.
Ahułam jana praviała ŭ pastarunku 8 hadzinaŭ.