Hrodzienca aštrafavali za raspaŭsiud niezarehistravanaj haziety
Sudździa Vital Łabocki pryznaŭ Juryja Łakcijonava vinavatym i pakaraŭ štrafam u 638 rubloŭ pavodle č.2 art. 22.9 KaAP.
Padstavaj dla pieraśledu stali dva pački asobnikaŭ niezarehistravanaj haziety «Hrodnienskoje vriemia», znojdzienyja siłavikami ŭ bahažniku aŭtamabila Łakcijonava padčas jaho zatrymańnia, paviedamlaje BAŽ.
Incydent z zatrymańniem zdaryŭsia ŭdzień 2 śniežnia, kali Łakcijonaŭ jechaŭ dachaty na abied. Pavodle jaho słoŭ, pa darozie ŭbačyŭ znajomuju i spyniŭsia, kab pavitacca, — u hety momant na jaho nakinulisia čatyry siłaviki ŭ cyvilnym, zatrymali z prymianieńniem siły, nadzieli kajdanki. Paśla praviali ahlad aŭtamabila, dzie i znajšli asobniki haziety. U pratakole Łakcijonaŭ ukazvaŭ, što źbiraŭsia zdać ich u makułaturu.
Paśla zatrymańnia siłaviki praviali pieratrusy ŭ jaho na pracy i doma, zabrali niekalki noŭtbukaŭ, telefonaŭ i fłeš-kartak, taksama zabrali na štrafstajanku aŭtamabil.
U Kastryčnckim RAUS, kudy dastavili zatrymanaha Juryja Łakcijonava, jamu stała drenna (chvareje na cukrovy dyjabiet). Mužčynu zabrali ŭ lakarniu, tam vyjaviłasia, što jon chvory na COVID-19.
Łakcijonaŭ amal miesiac znachodziŭsia na karancinie, a naprykancy studzienia atrymaŭ praz Viber pierarobleny pratakoł pa svajoj spravie. Pratakoł składała supracoŭnica milicyi Alaksandra Łuhoŭskaja, jana ž była vyklikanaja sudździoj na słuchańnie ŭ jakaści śviedki.
Zhodna z pastanovaj sudździ, Juryju Łakcijonavu buduć viernutyja jaho aŭtamabil i noŭtbuki, a telefony i fłeškartki zastanucca ŭ milicyi, pakul jon nie spłocić 638 rubloŭ štrafu (22 bazavyja vieličyni).
Mužčyna ličyć siabie nievinavatym i namierany abskardžvać rašeńnie Kastryčnickaha rajsuda paśla atrymańnia matyvirovačnaj častki.
«Liču, što sprava sšytaja biełymi nitkami. Jany skłali novy pratakoł, ale na sudzie ja i moj advakat ukazvali na vialikuju kolkaść milicejskich pamyłak, z-za jakich hetuju spravu ŭvohule nie treba składać. Ale sudździa ŭsio ž vyrašyŭ pakarać mianie vializnym štrafam», — zaznačyŭ Juryj Łakcijonaŭ.
«Hrodnienskoje vriemia» — małatyražnaja hazieta, jakuju biaspłatna raskidvajuć pa paštovych skrynkach. Ad žniŭnia vyjšła 16 numaroŭ vydańnia, jakoje infarmuje pra žyćcio i pratesty na Hrodzienščynie, u haziecie źmiaščajuć artykuły z partała Tut.by, «Radyjo Svaboda» dy inšych niedziaržaŭnych ŚMI.