Jeŭrasajuz razhladaje 4 varyjanty palityki da Biełarusi: ad «pačakajem i pabačym» da zamarozki adnosinaŭ
Naprykancy minułaha hodu ŭ Minsku ambasadary 16 dziaržavaŭ Eŭraźviazu i kiraŭnik pradstaŭnictva EZ raspracavali dakument, u jakim vykładajucca 4 varyjanty palityki adnosna Biełarusi.
Hety dakument, jaki trapiŭ u rasparadžeńnie «Radyjo Svaboda», budzie abmierkavany ŭ najbližejšy čas u Bruseli. Pakul nieviadoma, jaki z nastupnych prapanavanych varyjantaŭ prymie kiraŭnictva Eŭraźviazu.
«Pačakajem i pabačym»
Heta varyjant zachavańnia status quo. EZ užo zajaviŭ, što prezydenckija vybary 9 žniŭnia nie byli «ni svabodnymi, ni sumlennymi» i što Alaksandru Łukašenku «nie chapaje demakratyčnaj lehitymnaści». Paśla represij suprać udzielnikaŭ pratestaŭ Eŭraźviaz uvioŭ vizavyja sankcyi i zamarožvańnie aktyvaŭ u dačynieńni da 88 asobaŭ i 7 subjektaŭ haspadarańnia, u tym liku adnosna Łukašenki i jaho syna. Heta było zroblena tryma pakietami sankcyjaŭ naprykancy 2020 hodu. Hety scenar u dakumencie acharaktaryzavany jak «pastupovy padychod da sankcyjaŭ».
«Prahmatyčnaja roŭnaaddalenaść»
Hety varyjant praduhledžvaje intensiŭnaje dyplamatyčnaje ŭździejańnie, razmova idzie pra takija jaho formy, jak «maŭklivaja dyplamatyja, nakiravańnie misii vysokaha ŭzroŭniu ŭ Miensk albo zaprašeńnie pradstaŭnikoŭ aficyjnaha Miensku ŭ neŭtralnaje miesca (skažam, u Švajcaryju), kab abmierkavać prapanovu ab pasiarednictvie, zhoda na dyjaloh z režymam i ŭstupleńnie ŭ admysłovy dyjaloh z ABSE nakont sytuacyi ŭ Biełarusi, ustupleńnie ŭ dyjaloh na vysokim uzroŭni z Rasiejaj i ZŠA ab uzmacnieńni źniešniaha cisku na Miensk, a taksama stvareńnie admysłovaj kansultacyjnaj misii Eŭraźviazu ci pasady admysłovaha pradstaŭnika EZ dla Biełarusi».
«Istotnaje paharšeńnie adnosinaŭ»
Treci varyjant praduhledžvaje značnaje pašyreńnie śpisu asobaŭ i arhanizacyjaŭ, na jakich raspaŭsiudžvajucca sankcyi, a taksama panižeńnie ŭzroŭniu dyplamatyčnych adnosinaŭ da minimumu i «padtrymka raspačynańnia kryminalnych i inšych spravaŭ pavodle nacyjanalnaha zakanadaŭstva ŭ dziaržavach — čalcach EZ suprać vinavatych u katavańniach i biesčałaviečnym abychodžańni». Akramia taho, hety varyjant praduhledžvaje stvareńnie na padstavie Maskoŭskaha mechanizmu ABSE mižnarodnaha trybunału pa raśśledavańni parušeńniaŭ pravoŭ čałavieka ŭ Biełarusi.
«Amal poŭnaje zamarožvańnie adnosinaŭ»
Samy žorstki varyjant praduhledžvaje razryŭ dyplamatyčnych adnosinaŭ, poŭny sankcyjny režym, jaki zakranie šerah halinaŭ biełaruskaj pramysłovaści, zabaronu na prodaž eŭraablihacyjaŭ i, mahčyma, kaardynacyju sankcyjnaha režymu adnosna Biełarusi z sankcyjnym režymam adnosna Rasiei. U miežach hetaha varyjantu taksama moža razhladacca maratoryj na ŭdzieł Biełarusi ŭ strukturach «Uschodniaha partnerstva» i aficyjnaje pryznańnie ŭradu ŭ vyhnańni.
U dakumencie, padrychtavanym 17 vysokimi eŭrapiejskimi dyplamatami, akredytavanymi ŭ Miensku, taksama adznačajecca šerah krokaŭ, jakija pavinny zrabić biełaruskija ŭłady, kab adnavić «źmiastoŭny dyjaloh z Eŭraźviazam». Heta spynieńnie «ŭsialakich represij i parušeńniaŭ pravoŭ čałavieka, pieraśledu pradstaŭnikoŭ niezaležnych ŚMI i hramadzianskaj supolnaści».
Eŭraźviaz taksama patrabuje ad Miensku vyzvalić, reabilitavać palitviaźniaŭ i vypłacić im finansavuju kampensacyju, zabiaśpiečyć svabodnyja i sumlennyja vybary pad nahladam ABSE i stvaryć biaśpiečnyja ŭmovy dla viartańnia tych, chto ciapier u palityčnym i prymusovym vyhnańni.
Kiraŭniki dyplamatyčnych misijaŭ prapanujuć Bruselu razhledzieć pytańnie ab pašyreńni sankcyjaŭ, kali hetyja klučavyja patrabavańni EZ nia buduć vykananyja.
Siarod ludziej, jakija majuć trapić pad sankcyi, — najvyšejšyja słužbovyja asoby režymu, u tym liku ŭsie čalcy Rady biaśpieki, ich niepasrednyja svajaki, kiraŭniki abłasnych administracyjaŭ i pamočniki prezydenta ŭ rehijonach, a taksama «šarahovyja vykanaŭcy hvałtu ź liku pradstaŭnikoŭ milicyi, KDB i AMAPu».
Zamarožvańnie aktyvaŭ kampanijaŭ pavinna ŭklučać u siabie «dziaržaŭnyja pradpryjemstvy, jakija robiać svoj uniosak u finansavańnie režymu, takija jak pierapracoŭka nafty, zdabyča kaliju i chimičnaja vytvorčaść», finansavyja ŭstanovy, Mienski tranzytny bank, BiełAZ, MTZ, «Biełkamunmaš», MAZ, MZKC, Mienski elektratechničny zavod.
Na vypadak, kali sytuacyja jašče pahoršycca, dakument prapanuje ŭvieści halinovyja sankcyi, jakija ŭklučajuć zabaronu takim kampanijam, jak MasterCard, VISA i Swift, pradastaŭlać pasłuhi albo pastaŭlać tavary biełaruskim kampanijam, jakija zajmajucca enerhietykaj i syravinaj, a taksama ŭsim dziaržaŭnym kampanijam i tym kampanijam, jakija naležać fizyčnym asobam z sankcyjnaha śpisu EZ.