Hiermanija, Šviecyja i Polšča vysyłajuć rasijskich dypłamataŭ
MZS Hiermanii abviaściŭ piersonaj non hrata rabotnika rasijskaha pasolstva — jak adkaz na dziejańni Maskvy, jakaja vysłała niamieckaha dypłamata paśla akcyi pratestu, u jakoj toj, na dumku Kramla, udzielničaŭ, piša VVS.
Anałahičnyja pastanovy ŭ dačynieńni da rasijskich dypłamataŭ pryniali ŭ Šviecyi i Polščy.
«U adkaz na nieabhruntavanuju vysyłku rasijskim MZS polskaha dypłamata MZS Polščy, zychodziačy z pryncypu ŭzajemnaści i ŭ kaardynacyi z Hiermanijaj i Šviecyjaj, pryniataja pastanova ab pryznańni piersonaj non hrata supracoŭnika hienkonsulstva RF u Poznani», — paviedamili ŭ Ministerstvie zamiežnych spraŭ Polščy.
«My prainfarmavali rasijskaha pasła, što rabotnika rasijskaj ambasady paprasili pakinuć Šviecyju. Heta vyrazny adkaz na niedapuščalnaje rašeńnie vysłać šviedskaha dypłamata, jaki tolki vykonvaŭ svaje abaviazki», — zajaviła ministrka zamiežnych spraŭ Šviecyi Ann Linde.
Raniej rasijski MZS zajaviŭ, što terytoryju RF pavinny pakinuć dypłamaty sa Šviecyi, Polščy i Hiermanii — z-za ich udziełu ŭ akcyjach pratestu ŭ padtrymku Alaksieja Navalnaha, jakija prachodzili 23 studzienia.
Pradstaŭnik MZS Šviecyi zajaŭlaŭ, što šviedski dypłamat nie braŭ udziełu ni ŭ jakich demanstracyjach.
2 lutaha na sud pa spravie Alaksieja Navalnaha pryjšli dypłamaty amal dvuch dziasiatkaŭ krain, u tym liku Šviecyi, Polščy i Hiermanii. Dypłamataŭ raźmiaścili ŭ zale suda na zašklonym bałkonie.
Aficyjnaja pradstaŭnica MZS Rasii Maryja Zacharava zajaviła, što ich pavodziny — heta «nie prosta ŭmiašańnie va ŭnutranyja spravy suvierennaj dziaržavy, a samavykryćcio niepryhožaj i supraćzakonnaj roli kalektyŭnaha Zachadu ŭ sprobach strymać Rasiju».