«Vyrašyli razabracca i pajšli na hałasy»: na sudzie pa spravie Cichanoŭskaha dapytali ŭčastkovaha, jaki na pikiecie 29 maja ŭ Hrodnie apynuŭsia na ziamli
U paniadziełak (heta byŭ treci dzień suda) byŭ dapytany staršy ŭčastkovy inśpiektar hramadskaha punkta achovy paradku №2 (Leninski rajon Hrodna) staršy lejtenant milicyi Uładzimir Kazłoŭski. Pavodle viersii abvinavačvańnia, mienavita da jaho Jaŭhien Raźničenka ŭžyŭ hvałt, paviedamlaje spring96.org.
Na sudzie jon raspaviadaje, što kala 20:00 29 maja pa hałoŭnaj radyjostancyi milicyi «pastupiła kamanda ab nieabchodnaści prybyć na płošču dla praviadzieńnia tłumačalnaj hutarki hramadzianam». Kazłoŭski razam z Aleksandram Chvaleniem [taksama paciarpieły pa spravie] adpravilisia tudy pieššu.
Pavodle acenki milicyjanta, na Savieckaj płoščy 29 maja znachodziłasia bolš za 100 čałaviek. Kazłoŭski, pavodle jaho słovaŭ, prybyŭ dla taho, kab rastłumačyć ludziam patrabavańni ab zachavańni sacyjalnaj dystancyi. Potym jon z kaleham pačuŭ žanočyja hučnyja hałasy i kryki. Jany vyrašyli padyści i razabracca, u čym sprava:
«Padyšli, da nas źviarnulisia žančyny, jakija rastłumačyli, što ŭ Cichanoŭskaha adbyvajecca niejki słoŭny kanflikt z adnoj z žančyn, jakaja była apranutaja ŭ kiepku, z maskaj na tvary, a mienavita: zadavała jamu pytańni, a jon nie chacieŭ adkazvać na hetyja pytańni. Dalej my vyrašyli razabracca i pajšli na hałasy.
Staŭ čutny hołas Cichanoŭskaha i hołas niejkaj žančyny. My pajšli i ŭbačyli raniej nieznajomuju nam žančynu i Cichanoŭskaha, jakija razmaŭlali pamiž saboj na pavyšanych tanach. My padyšli, pradstavilisia, spytali ŭ žančyny, što adbyvajecca. Jana patłumačyła, što jana zadaje pytańni z nahody situacyi Cichanoŭskaha, pieradvybarnaj kampanii jaho žonki, a Cichanoŭski ŭsialak ihnaruje i pravakuje ź joj kanflikt, sprabuje syści. Z metaj usiebakovaha razhladu my vyrašyli źviarnucca da Cichanoŭskaha, vysłuchać jaho mierkavańnie, što tam adbyvałasia».
Pa słovach Kazłoŭskaha, jaho adrazu abchapiŭ zzadu čałaviek, potym jaho ŭdaryli ŭ bok u žyvot, a paśla hetaha jon upaŭ na ziamlu.
«Paśla ŭdaru ŭ skronievuju vobłaść ja staŭ hublać raŭnavahu, to-bok mianie stała ciahnuć nazad»
Z pakazańniaŭ milicyjanta na sudzie stała zrazumieła, što pieršapačatkova asnoŭnaj pretenzijaj milicyi na vybarčym pikiecie ŭ Hrodnie 29 maja stała nievykanańnie sacyjalnaj dystancyi, što patrabuje epidemijałahičnaja situacyja z COVID-19. Kazłoŭski raspavioŭ, što adrazu jany papiaredžvali ŭsich ab zachavańni dystancyi praz hučnahavaryciel, potym prosta prasili ŭsich nie toŭpicca i apranać maski.
«Kali my padyšli da Cichanoŭskaha, to ja ŭbačyŭ, što jon staŭ adychodzić nazad. Takim čynam, jon pasprabavaŭ schavacca ad natoŭpu. Ja z metaj źviarnuć jaho ŭvahu pasprabavaŭ schapić jaho za ruku. Zatrymlivać jaho nichto nie źbiraŭsia: tolki źviarnuć uvahu, kab zhładzić kanflikt. Ja ŭziaŭ jaho za ruku, u hety momant stali čutnyja kryki, vokličy z natoŭpu, natoŭp pačaŭ ściskacca.
U hety momant Cichanoŭski vychapiŭ ruku, paśla čaho ja adčuŭ udar u skronievuju vobłaść źleva. Chto i čym mianie ŭdaryŭ — ja nie bačyŭ. Heta ŭsio adbyvałasia vielmi chutka: za 10-15 siekund. Ja znachodziŭsia jak byccam u šokavym stanie. Kali ja pryjechaŭ u balnicu, u mianie była šyška. Na płoščy ja adčuŭ bol. Paśla ŭdaru ŭ skronievuju vobłaść ja staŭ hublać raŭnavahu, to-bok mianie stała ciahnuć nazad.
Ja adčuvaŭ, što niešta mianie ciahnie nazad. U mianie pierachapiła dychańnie, stała ciažka dychać. Natoŭp pačaŭ zdušvacca — adčuvańnie, što mianie zdušvali. Ja ŭpaŭ, tamu što niejkaja siła pačała mianie ciahnuć. U hetym momant ja adčuŭ jašče dadatkova ŭdar u žyvot, pad rebry.
Kali ja apynuŭsia na ziamli, to ŭbačyŭ, što za mnoj znachodziŭsia mužčyna ščylnaha ciełaskładu, u kiepcy, u skuranoj kurtcy. Raniej ja hetaha mužčynu nie bačyŭ», — raspaviadaje ŭčastkovy Kazłoŭski pra padziei 29 maja.
Paciarpieła skura na słužbovych tuflach
Pa słovach učastkovaha, jaho kalehu Chvaleniu natoŭpam pačało «znosić da centra». Jak ličyć Kazłoŭski, ich chacieli raźjadnać. Pa słovach učastkovaha, z saboj u jaho byŭ uklučany videarehistratar, ale pakul nieviadoma, ci budzie videazapis ź jaho vyvučany ŭ sudzie.
Kazłoŭski patłumačyŭ, što adčuŭ fizičny bol dva razy: padčas ŭdaru ŭ levuju skroń i ŭ žyvot:
«Ja nie mahu skazać, ci byli heta niejkija ŭdary abo ruchi».
Taksama ŭčastkovy zajaviŭ u sudzie, što ŭ vyniku dziejańniaŭ 29 maja na Savieckaj płoščy było paškodžanaje taksama jaho formiennaje abmundziravańnie: byŭ adarvany ź levaha rukava šaŭron, paškodžany słužbovyja tufli.
«Adzieŭ novyja tufli, atrymaŭ novyja tufli. Padrapali skuru. Heta adbyłosia ŭ vyniku bojki: taptalisia pa nahach, pa asfalcie dzieści… Na słužbu apranuŭ novyja tufli».
Uładzimir Kazłoŭski zajaviŭ u sudzie, što 29 maja jon sam upaŭ na ziamlu — nichto jaho nie prytrymlivaŭ u hety momant.
Paśla taho jak jon upaŭ, natoŭp razyšoŭsia. Jon raspavioŭ, što ŭ hety čas Mikałaj Salanik staŭ havaryć u hučnahavaryciel, što heta pravakacyja i kab natoŭp «nie vioŭsia na heta», pačaŭ vyśmiejvać heta.
Paśla hetaha, jak raskazvaje Kazłoŭski, ludzi dapamahli jamu padniacca, addali šaŭron, praviali na aleju, pasadzili na łavačku, vyklikali chutkuju. Potym «chutkaja» dastaviła ŭ BCHMD. Tam jamu dyjahnastavali traŭmu žyvata. Raniej Kazłoŭski taksama zajaŭlaŭ, što ŭ vyniku ŭdaru ŭ skroniu, u jaho ŭtvaryłasia šyška. Z materyjałaŭ spravy stała viadoma, što na jaho lačeńnie syšło amal 500 rubloŭ.
«Nam paviedamili tolki, što budzie prachodzić pikiet pa zbory podpisaŭ»
Na pytańnie prakurora, jak Kazłoŭski zrazumieŭ, što heta Cichanoŭski, jon raspavioŭ:
«Da padziej 29 maja ja źjaŭlaŭsia pradstaŭnikom u sudzie milicyi Leninskaha rajona pa razhladzie administracyjnaj spravy pa art. 23.34 KaAP pa fakcie ŭdziełu hramadzian u niesankcyjanavanym masavym mierapryjemstvie na nabiarežnaj, kali Cichanoŭski braŭ intervju ŭ hramadzian. Jon mnie byŭ znajomy pa słužbovaj dziejnaści».
Tut ža Kazłoŭski patłumačyŭ, što jon nie viedaŭ, što Cichanoŭski budzie prymać udzieł u pikiecie 29 maja, ab hetym nie havaryłasia i na instruktažy:
«Nam paviedamili tolki, što budzie prachodzić pikiet pa zbory podpisaŭ».
Na pytańnie advakatki ab proźviščy načalnika, jaki pravodziŭ instruktaž pierad vybarčym pikietam 29 maja ŭ Hrodnie, Uładzimir Kazłoŭski admoviŭsia nazyvać jaho imia. Kazłoŭski nie staŭ paviedamlać taksama, chto mienavita prysutničaŭ na hetym instruktažy. Viadoma tolki, što, akramia Chvaleni i Kazłoŭskaha, tam było jašče niekalki supracoŭnikaŭ milicyi. Taksama jon nie moh patłumačyć, jakija zadačy stavilisia pierad supracoŭnikami milicyi na pikiecie 29 maja.
Nahadajem, na pieršym sudovym pasiadžeńni Kazłoŭski zajaviŭ pazoŭ da Raźničenki ab kampiensacyi maralnaj škody na sumu 8000 rubloŭ.