Arciomu Saŭčuku dali čatyry hady kałonii. Jon «dapamoh šturchanuć kalaski na stajancy handlovaha centra»
9 lutaha sud Frunzienskaha rajona ahučyŭ prysud 30-hadovamu palitviaźniu Arciomu Saŭčuku. Jaho pryznali vinavatym pa č. 2 art. 293 Kryminalnaha kodeksa i asudzili da čatyroch hadoŭ pazbaŭleńnia voli ŭ kałonii ŭzmocnienaha režymu. Pazoŭ «Minsktransa» budzie vydzieleny ŭ asobnuju hramadzianskuju vytvorčaść, paviedamlaje spring96.org.
Spravu razhledzieła sudździa Julija Bliźniuk. Dziaržaŭnaje abvinavačańnie pradstaŭlała Alina Kaśjančyk. 15 studzienia siabra Arcioma Saŭčuka, palitviaźnia Arcioma Chvaščeŭskaha, ź jakim jany byli ŭ toj viečar, asudzili da hoda pazbaŭleńnia voli ŭ kałonii ahulnaha režymu. Spravu taksama razhladała Julija Bliźniuk.
Samoha Arcioma Chvaščeŭskaha taksama vyklikali dla śviedčańniaŭ — jon daŭ takija ž samyja pakazańni, jak i jaho siabry, ź jakimi jon byŭ u toj viečar: Saŭčuk i Syčyk. Jon raspavioŭ, što jany pryjechali na viasielle da školnaha siabra, paśla čaho płanavali viarnucca ŭ Polšču. U Biełarusi jany ŭdzielničali ŭ mirnym schodzie.
Abaronca palitviaźnia Siarhiej Lebiedzieŭ padkreśliŭ, što pakazańni paćvierdzilisia zapisami z kamier nazirańnia. Ich prahledzieli nie adrazu: čaćviortaha lutaha bolšaja častka sudovaha dnia była patračanaja na toje, kab pasprabavać adkryć dyski z materyjałami spravy — z bolš čym tryccaci dyskaŭ u sudzie nad prahramistam zmahli adkryć tolki try.
«I Arciom, i jaho siabry dali pryncypijalna anałahičnyja pakazańni, — adznačyŭ advakat palitviaźnia. — Kali jany viartalisia dadomu, ruch byŭ zabłakavany, tamu jany pryparkavali mašynu na adnoj z vulic i praciahnuli ruch pieššu. Padčas vybuchaŭ jany časova zhubilisia, ale potym znajšlisia kala handlovaha centra «Civali». Tam Saŭčuk dapamoh nieviadomym jamu ludziam, jakija pieramiaščali kalaski supiermarkieta — tolki tamu, što jany pierasoŭvali ich ź ciažkaściu. Jon nie mierkavaŭ, što hetyja kalaski mohuć być vykarystanyja ŭ supraćpraŭnych dziejańniach. Pakazańni paćviardžajucca fotazdymkami i videa, jakija zrabiŭ na telefon Chvaščeŭski. Paćviardžajecca i fakt pierasoŭvańnia kalasak supiermarkieta na nievialikaj častcy darohi».
Adnak u toj ža čas abarona padkreśliła, što ŭ vinu Saŭčuku stavicca «razukamplektavańnie i vyniaćcie kalasak z parkovačnaha boksa» — takija vysnovy śledčy zrabiŭ na asnovie prahledžanych videa z kamier nazirańnia i invientarnych numaroŭ kalasak. Adnak na videa bačna, jak Saŭčuk i siabry na niekatory čas źnikajuć z zony ahladu kamiery. Śledstva paličyła, što pakolki Saŭčuk moh znachodzicca ŭ boksie padčas vykočvańnia kalasak, to vinu možna ličyć dakazanaj — inšych dokazaŭ sudu nie pradstaŭlena.
«Pa sutnaści, śledčy ŭ pratakole dapuściŭ zdahadku, jakaja nie moža być pryniata za dokaz pavodle prezumpcyi nievinavataści, — adznačyŭ Siarhiej Lebiedzieŭ. — Akramia hetaha, i abvinavačany, i śviedki kažuć, što jany nie zachodzili ŭ boks».
Advakat taksama zaznačyŭ, što śledstva i prakuratura pamyłkova dapuściła pašyranaje tłumačeńnie paniaćcia «pahrom», začytaŭšy tłumačeńni słova ŭ roznych słoŭnikach i adznačyŭšy, što takoj źjavy ŭ Biełarusi nie było. Ličyć vykradańniem vyniaćcie kalasak ź miesca chranieńnia ŭ kramie i pierasoŭvańnie ich na 140 mietraŭ taksama nielha: nie paćvierdžanyja karysnyja matyvy, handlovaja sietka nie paniesła škody, a taksama — vykarystańnie kalasak pa-za kramaj dapuščajecca praviłami handlovych sietak.
«Saŭdzielnictva patrabuje dokazu złoha namieru, tamu liču jaho nie paćvierdžanym, — skazaŭ Siarhiej Lebiedzieŭ. — Arciom kiravaŭsia altruizmam i nie mierkavaŭ, dla jakich metaŭ buduć vykarystany kalaski. Mienavita za toje, što jon nie razabraŭšysia ŭ situacyi, prajaviŭ spahadlivaść, jon ciapier i pryciahvajecca da kryminalnaj adkaznaści».
Padčas prahladu videa z rehistratara Arcioma nie paćvierdziłasia infarmacyja pra toje, što jon nibyta vykrykvaŭ łozunhi kala SIZA-1 na Vaładarskaha.
Prakuror zaprasiła dla Arcioma Saŭčuka čatyry hady pazbaŭleńnia voli ŭ kałonii ŭzmocniennaha režymu, a taksama zadavolić hramadzianski pazoŭ Minsktransa — 21 tysiaču 839 rubloŭ. Sudździa pryznačyła mienavita takoje pakarańnie.
U apošnim słovie Arciom zhadaŭ baćkoŭ, siastru, babul i dziadul, siabroŭ i svajakoŭ. «Usich mocna abdymaju, usich lublu. Nie chvalujciesia za mianie».