«U telehram-kanale abraziła ministra Kubrakova». U Smalavičach sudziać šmatdzietnuju maci
Sud Smalavickaha rajona 9 lutaha pačaŭ razhlad kryminalnaj spravy pa abvinavačvańni Kaciaryny Sazonavaj. Žančynu vinavaciać u abrazie pradstaŭnika ŭłady ŭ suviazi z vykanańniem im słužbovych abaviazkaŭ (art. 369 KK RB), piša spring96.org.
Kaciaryna Sazonava z advakatam u sudzie
Spravu razhladaje sudździa Ludmiła Jakaŭleva, dziaržabvinavaŭca — prakuror Łaŭkiet.
Pa materyjałach śledstva, znachodziačysia pa miescy svajho žycharstva ŭ h. Smalavičy, u publičnym dostupie ŭ sietcy Internet, vykarystoŭvajučy mabilny telefon, u adnym z telehram-kanałaŭ, naŭmysna, z metaj publičnaj abrazy pradstaŭnika ŭłady, Sazonava raźmiaściła nieprystojnyja pa formie i źnievažalnyja pa nakiravanaści tekstavyja paviedamleńni ŭ dačynieńni da ministra ŭnutranych spraŭ Respubliki Biełaruś hienierał-majora milicyi Ivana Kubrakova.
Kaciaryna Sazonava — maci traich dziaciej, dvoje ź jakich niepaŭnaletnija. Ciapier znachodzicca ŭ dekretnym adpačynku pa dohladu za dziciom.
Advakat abvinavačanaj Bołatava zajaviła chadajnictva ab praviadzieńni zakrytaha sudovaha pasiadžeńnia. Sudździa adchiliła, pakolki paciarpieły Kubrakoŭ takoha chadajnictva nie vyłučaŭ.
Kaciaryna Sazonava całkam pryznaje vinu ŭ zdiejśnienym.
Sud zapatrabavaŭ dapytać śviedku, supracoŭnika milicyi, jaki zajmaŭsia manitorynham čata, dzie byŭ raźmieščany abraźlivy dopis.
Abvieščany pierapynak dla vykliku śviedki da 12:00 17 lutaha.