«Budu raskazvać pra Rady studentaŭ». Samaja maładaja vystupoŭca na UNS — 23-hadovaja studentka-miedyk ź Viciebska
Studentka 6 kursa VDMU Hanna Kazłova apošnim časam pieryjadyčna ŭspłyvaje ŭ miedyjaprastory. Jana vystupała na łukašenkaŭskim Žanočym forumie, źjaŭlałasia na staronkach «Sovietskoj Biełoruśsii». A ciapier dziaŭčyna vystupić na Usiebiełaruskim narodnym schodzie: pamiž namieśnikam načalnika Hienštaba i staršynioj homielskaha «Sajuza žančyn».
«Naša Niva» źviazałasia z Kazłovaj.
«Ja staršynia Rady studentaŭ. Vielmi časta ŭdzielničała ŭ raznastajnych mierapryjemstvach pa roznych kirunkach. Akramia taho, što ja studentka, ja pastajanna znachodžusia ŭ kantakcie z raznastajnymi arhanizacyjami moładzievymi. Kali ja daviedałasia pra UNS, vyłučała svaju kandydaturu. A ŭžo BRSM jaje zaćvierdziŭ — u ich była kvota», — raspaviała dziaŭčyna.
Pa jaje słovach, toje, što jana budzie vystupać z pramovaj — «sumiesnaje rašeńnie». Kazłovu paprasili vystupić na temu moładzi, ale tekst vystupu raspracavała jana sama, zapeŭnivaje dziaŭčyna.
Pra što ž budzie kazać studentka na Schodzie?
«Moj vystup budzie źviazany z moładździu i jaje ŭdziełam u hramadska-palityčnym žyćci krainy, — skazała Hanna. — Sutnaść vystupu: moładź varta aktyŭna dałučać da abmierkavańnia i rašeńnia praktyčnych zadač. Praktyčna va ŭsich arhanizacyjach adukacyi jość roznyja arhanizacyi, u tym liku i Rady studentaŭ, i, adpaviedna, mienavita praz Rady studentaŭ možna davać zadačy, a ŭžo jak ich buduć vyrašać studenty, adpaviedna i hladzieć. Takim čynam studenty buduć vučycca ŭ kiraŭnictva, jak pravilna ŭsio arhanizoŭvać. I pry hetym kreatyŭ moładzi taksama nichto nie admianiaŭ. Heta budzie vopyt starejšaha pakaleńnia i kreatyŭ moładzi».