Pucin: Łukašenka čałaviek aryhinalny
Rasija rychtujecca zakryć svoj rynak dla biełaruskaj małočnaj pradukcyi. Pra heta zajaviŭ učora Uładzimir Pucin.
Prem`ier‑ministr Rasii Uładzimir Pucin zajaviŭ pra nieabchodnaść farmiravańnia adzinych umoŭ vydzialeńnia datacyj sielhasvytvorcam Rasii i Biełarusi.
5 červienia ŭ Biełharodskaj vobłaści na sustrečy z hubiernatarami šerahu centralnych abłaściej krainy i pradstaŭnikami sielhaspradpryjemstvaŭ kiraŭnik urada daŭ zrazumieć, što Rasija hatova pryniać miery pa abaronie svaich vytvorcaŭ, paviedamlaje RIA «Novosti».
Pavodle słoŭ U.Pucina, datacyi, jakija Biełaruś vydzialaje svaim vytvorcam celnaha małaka, dasiahajuć 24%, u toj čas jak u Rasii hetyja datacyi składajuć tolki 3%.
Prem`ier‑ministr paviedamiŭ, što zakranaŭ hetuju temu pry znosinach ź biełaruskimi partniorami i tyja vykazali hatoŭnaść abmiarkoŭvać pytańnie ab datacyjach na pieramovach.
Pry hetym U.Pucin padkreśliŭ: «Ja dobra viedaju, u jakim režymie hetyja padychody vypracoŭvajucca z našymi kalehami — heta moža być doŭha, tamu ja ciapier daŭ ukazańnie mytnaj słužbie sfarmulavać prapanovy, jakija b dazvolili nam stvaryć nieabchodnyja ŭmovy dla viadzieńnia hetaha pieramoŭnaha pracesu».
Hubiernatar Biełharodskaj vobłaści Jaŭhien Saŭčanka, jaki braŭ udzieł u naradzie, paviedamiŭ, što impart celnaha małaka ź Biełarusi ŭ Rasiju składaje 2 młn. ton u hod. «Biełaruś siońnia źniščaje našu małočnuju halinu. Moža, heta robicca metanakiravana», — skazaŭ hubiernatar.
U.Pucin pahadziŭsia z hetym častkova: «Heta, viadoma, robicca nie metanakiravana».
«Ja pra heta [datacyi] Alaksandru Ryhoraviču skazaŭ. Jon čałaviek aryhinalny, adkaz u jaho byŭ taki: «Niachaj vašy nie piščać, niachaj źnižajuć vydatki», — skazaŭ prem`ier‑ministr.
Jon taksama paviedamiŭ, što na pieramovach ź ministram sielskaj haspadarki Biełarusi abmiarkoŭvałasia pytańnie ab umovach, na jakich rasijskija inviestary, što pažadali nabyć biełaruskija sielhaspradpryjemstvy, zmohuć pastaŭlać pradukcyju ŭ Rasiju.
«Ja jamu skazaŭ: my ciapier źbirajemsia zrabić adzinuju mytnuju prastoru, i našy inviestary źbirajucca nabyvać vašy pradpryjemstvy, i my pavinny vystraić adzinuju sistemu rehulavańnia i datavańnia ŭ sielskaj haspadarcy. Na pytańnie Alaksandra Ryhoraviča, ci zmohuć jany pastaŭlać [pradukcyju] jak zachočuć, ja kažu — nie, jany pavinny pracavać pa adzinych praviłach. A kali jany buduć karystacca vašymi pryvilejami, my vymušany budziem ich pradukcyju na rasijskim rynku zakryć», — skazaŭ U.Pucin.
1 červienia ŭ interv`iu bujnym rasijskim drukavanym vydańniam A.Łukašenka abvinavaciŭ Rasiju ŭ abmiežavańni pastavak biełaruskich praduktaŭ, jakija tańniejšyja dziakujučy dziaržpadtrymcy sielskaj haspadarki.