U niadzielu Siomucha ŭ pravasłaŭnych
U niadzielu pravasłaŭnyja chryścijanie adznačajuć Siomuchu, abo Trojcu — śviata, ustanoŭlenaje ŭ pamiać sychodu Śviatoha Ducha na apostałaŭ. Jano adznačajecca praź siem tydniaŭ paśla Vialikadnia, adsiul i narodnaja nazva — Siomucha. Heta adno z najbolšych carkoŭnych śviataŭ.
Śviata nakłałasia na staradaŭniuju narodnuju tradycyju adznačać nadychod leta. Tamu i ŭpryhožvajuć carkvu na hety dzień halinkami biarozaŭ, a chaty vyściłajuć «majem» — ajeram ci inšymi duchmianymi travami.
Pavodle Biblii, na piacidziesiaty dzień paśla Uvaskresieńnia Chrystovaha dom, dzie sabralisia vučni Chrysta, napoŭniŭ huł ź nieba, i źjavilisia ahniavyja jazyki, jakija kranuli apostałaŭ, paśla čaho ŭ ich źjaviŭsia dar prapaviedavać na roznych movach narodaŭ śvietu.