Pačaŭsia sud nad chłopcam, jakoha 9 žniŭnia kala Steły źbiŭ aŭtazak
Sud Centralnaha rajona stalicy pačaŭ razhladać čarhovuju kryminalnuju spravu ab masavych biesparadkach. Jaje asablivaść u tym, što abvinavačany — toj samy chłopiec, jakoha 9 žniŭnia ŭ rajonie steły źbiŭ aŭtazak i jakoha pieršy čas navat ličyli zahinułym. Akazałasia, paśla zdareńnia jon trapiŭ z traŭmami ŭ balnicu, a zatym byŭ źmieščany pad vartu. Chłopcu moža pahražać da troch hadoŭ pazbaŭleńnia voli, piša Tut.by.
Fota Nadziei Bužan
«Vyjšaŭ na prajeznuju častku i zaskočyŭ na MAZ»
Spravu razhladaje sudździa Viktoryja Šabunia. Abaraniaje abvinavačanaha advakat Dźmitryj Łazavik.
Abvinavačany Jahor Suhojdź u turmie sustreŭ dzień naradžeńnia — u śniežni jamu spoŭniŭsia 31 hod. Mužčyna raskazaŭ, što rodam jon ź Minska, maje siarednie-śpiecyjalnuju adukacyju, chałasty, dziaciej niama, raniej nie sudzimy. Na momant suda pracy jon užo nie mieŭ.
Dziaržabvinavaŭca paviedamiŭ, što 9 žniŭnia minułaha hoda kala 20.00−23.00 Suhojdź u stanie ałkaholnaha apjanieńnia ŭziaŭ aktyŭny ŭdzieł u hrupavych niesankcyjanavanych masavych dziejańniach. Udzielniki hrupy byli niezadavolenyja padziejami hramadska-palityčnaha žyćcia krainy, pryciahvali da siabie ŭvahu tym, što ruchalisia pa piešachodnaj i prajeznaj častkach darohi. Pry sabie mieli płakaty, transparanty, ściahi.
Sam Jahor Suhojdź vyjšaŭ na prajeznuju častku vulicy i zaskočyŭ na MAZ pa kanvajavańni. Jaho dziejańni paciahnuli parušeńnie hramadskaha paradku, a taksama pieraškodzili ruchu hramadskaha transpartu. Dziejańni abvinavačanaha kvalifikavanyja śledstvam pa č. 1 art. 342 KK Biełarusi. Maksimalnaja sankcyja artykuła praduhledžvaje pazbaŭleńnie voli na termin da 3 hadoŭ.
Abvinavačany vinu pryznaŭ častkova: na mitynhu byŭ, z tym, što skakaŭ na MAZ, — nie zhodny.
Padziei, z-za jakich Jahor Suhojdź staŭ abvinavačanym pa kryminalnaj spravie, adbylisia 9 žniŭnia — u pieršy dzień pratestaŭ paśla prezidenckich vybaraŭ. Jak potym raspavioŭ adzin ź vidavočcaŭ, aŭtazak padjechaŭ da pratestoŭcaŭ sa śpiny, kali jany stajali tvaram da steły, nasuprać siłavikoŭ sa ščytami. Śpiecaŭtamabil spačatku ledź prytarmaziŭ, a potym hazanuŭ i pajechaŭ na ludziej. Pry hetym jon nijakich papieradžalnych sihnałaŭ nie padavaŭ. Momant zdareńnia zafiksavany na videakamieru.