Vialiki art-fiestyval u «Haryzoncie» admienieny. U pałonie ŭłaśnikaŭ pamiaškańnia zastajucca 70 mastackich prac
Fiestyval sučasnaha mastactva Moving Art Festival musiŭ raspačacca 6 sakavika ŭ art-prastory MAF, što zajmaje 1600 kvadratnych mietraŭ zavoda «Haryzont». U apošni momant mierapryjemstva było pieraniesiena praz toje, što ŭładalnik placoŭki abmiežavaŭ dostup da pamiaškańnia. Pakolki ŭvachod tak i nie byŭ adkryty, siońnia arhanizatary paviedamili pra admienu fiestyvalu.
Pavodle arhanizataraŭ, dostupu da pamiaškańniaŭ, u jakich znachodziacca abstalavańnie, pradukcyja, dakumienty, pracy mastakoŭ, a taksama asabistyja rečy, jany nie majuć z 1 sakavika. Aficyjnaha tłumačeńnia situacyi ŭładalnik im nie pradstaviŭ.
«Što my atrymali za hetyja paŭmiesiaca ad ZAT «HBD» u asobie dyrektara Kavalovaj Iny Hieorhijeŭny: šantaž, niezakonnaje ŭmiašańnie ŭ našu pracu i parušeńnie našaj kamiercyjnaj tajamnicy, niezakonnaje ŭmiašańnie ŭ prahramu i scenaryj fiestyvalu sa sprobaj ich źmianić, atrymańnie asabistych źviestak usich udzielnikaŭ i supracoŭnikaŭ šlacham šantažu i manipulacyj, siłavoje niezakonnaje ŭtrymańnie asabistych i arandavanych rečaŭ, psichałahičny i finansavy cisk, prymušeńnie da zakładu asabistaj majomaści, abrazy i vymahańnie», — pišuć arhanizatary ŭ svaim zvarocie.
Pakolki ŭsie materyjały i dakumienty zastalisia na terytoryi zavoda «Haryzont», praviadzieńnie fiestyvalu na inšaj placoŭcy pakul niemahčymaje. Aproč admieny mierapryjemstva, arhanizatary taksama abviaścili ab zakryćci samoj art-prastory MAF.
«Na praciahu ŭsich hetych dzion my zmahalisia za naš prajekt jak mahli i vykonvali ŭsie ŭmovy, ale jany ŭvieś čas mianialisia. My praciahvajem zmahacca za vyzvaleńnie rečaŭ i šukajem inšuju placoŭku».
Moving Art Festival rychtavaŭsia ciaham šaści miesiacaŭ i musiŭ abjadnać u sabie muzykalnuju, kina-teatralnuju, tancavalnuju siekcyi, a taksama ekskursii, majstar-kłasy i lekcyi z varkšopami.