Bijamietryčnyja pašparty ŭvodziacca ŭ Biełarusi z 1 vieraśnia
Alaksandr Łukašenka 16 sakavika padpisaŭ ukaz numar 107 «Ab bijamietryčnych dakumientach», paviedamlaje BiełTA.
U adpaviednaści z ukazam bijamietryčnyja dakumienty ŭ krainie ŭvodziacca z 1 vieraśnia hetaha hoda. Ich vykarystańnie daść mahčymaść aŭtamatyzavać praceduru identyfikacyi asoby, spraścić prachodžańnie pašpartnaha kantrolu pry pierasiačeńni hranicy, budzie sadziejničać raźvićciu elektronnych servisaŭ.
U dakumienty novaha typu budzie ŭbudavana mikraschiema, što źmiaščaje fotavyjavu, adpiačatki palcaŭ ruk i inšyja piersanalnyja danyja ŭładalnika.
Usiaho źjavicca 8 novych vidaŭ dakumientaŭ, što źmiaščajuć bijamietryčnyja danyja, u tym liku identyfikacyjnaja kartka hramadzianina i bijamietryčny pašpart. Za vydaču identyfikacyjnaj kartki treba budzie zapłacić 1,5 bazavaj vieličyni (1 BV — 29 rubloŭ), bijamietryčnaha pašparta — 2 BV.
ID-kartki płanujecca vykarystoŭvać na terytoryi našaj krainy dla zaśviedčańnia asoby ŭładalnika. Bijamietryčnyja pašparty spatrebiacca dla vyjezdu za miažu (kali hramadzianin nie płanuje takija pajezdki, to atrymlivać hety pašpart nie treba). Jaho vyrab mahčymy tolki pry najaŭnaści ŭ zajaŭnika identyfikacyjnaj kartki.
Taksama pašyrajecca funkcyjanał dakumientaŭ, jakija zaśviedčvajuć asobu. Za košt vykarystańnia asabistaha elektronnaha ličbavaha podpisu identyfikacyjnaja kartka daść mahčymaść ažyćciaŭlać jurydyčna značnyja dziejańni ŭ elektronnym vyhladzie.
Abaviazkovaj zamieny najaŭnych u nasielnictva pašpartoŭ na novyja bijamietryčnyja dakumienty nie płanujecca. Pašpart hramadzianina Respubliki Biełaruś, jaki dziejničaje ciapier, budzie vydavacca na raniejšych umovach.
Hramadzianie samastojna buduć vyrašać, jaki vid dakumienta, što zaśviedčvaje asobu, jany chočuć atrymać (bijamietryčnyja dakumienty abo pašparty dziejučaha ŭzoru). Košt afarmleńnia dziejučych pašpartoŭ nie źmienicca. Zachoŭvajecca i mahčymaść vyjezdu za miažu pa hetym dakumiencie.