Hienprakuratura raspaviała, kolki biełarusaŭ trapiła pad «kryminałku» za pratesty i abrazy siłavikoŭ
U Hienprakuratury paviedamili statystyku pa kryminalnych spravach, źviazanych z akcyjami pratestaŭ. Bolš za 400 čałaviek užo asudžanyja, paviedamlaje Tut.by sa spasyłkaj na pres-słužbu viedamstva.
Tut.by
— Da ciapierašniaha času prakurory nakiravali ŭ sudy 468 kryminalnych spraŭ u dačynieńni da 631 asoby, jakija źviazany z udziełam u niezakonnych masavych mierapryjemstvach i dziejańniach, jakija hruba parušajuć hramadski paradak, hvałtam i pahrozaj jaho prymianieńnia da pradstaŭnikoŭ pravaachoŭnaha błoka, ich publičnaj abrazaj, apahańvańniem nadpisami čužoj majomaści, chulihanstvam, ździekam nad dziaržaŭnaj simvolikaj. Bolš za 400 asob užo asudžanyja, — zajavili ŭ Hienprakuratury.
U viedamstvie kažuć, što «apieratyŭnaje vyjaŭleńnie hramadzian» pravodzicca ŭ tym liku pry dapamozie aŭtamatyzavanaha abstalavańnia i śpiecyjalizavanaha prahramnaha zabieśpiačeńnia.
U Hienprakuratury jašče raz nahadali pra «niepaźbiežnaść pryciahnieńnia da adkaznaści asob, jakija pasiahajuć na paradak kiravańnia i hramadskuju biaśpieku» i zajavili, što «kožny niezakonny akt padviarhajecca strohaj pravavoj acency».