Mužčynu asudzili na try hady chatniaj chimii za toje, što na akcyi schapiŭsia za dubinku amapaŭca
U sudzie Frunzienskaha rajona prajšoŭ razhlad kryminalnaj spravy suprać 55-hadovaha Anatola Piatroŭskaha, abvinavačanaha pa artykule 364 Kryminalnaha kodeksa za hvałt u dačynieńni da supracoŭnika milicyi na akcyi pratestu. Spravu razhladała sudździa Natalla Buhuk. Jana prysudziła mužčynie try hady «chatniaj chimii», paviedamlajuć pravaabaroncy.
Pavodle abvinavačvańnia, padčas akcyi pratestu, jakaja prachodziła ŭ Minsku na praśpiekcie Pieramožcaŭ 4 kastryčnika, Piatroŭski ździejśniŭ hvałtoŭnyja dziejańni ŭ dačynieńni da supracoŭnika AMAPa Ziukina, a mienavita schapiŭ jaho humavuju dubinku i ažyćciaviŭ ryvok, tym samym pryčyniŭšy jamu fizičny bol.
Na mužčynu zaviali kryminalnuju spravu pa artykule ab hvałcie ŭ dačynieńni da supracoŭnika milicyi (art. 364 KK) i pa artykule ab aktyŭnym udziele ŭ hrupavych dziejańniach, jakija hruba parušajuć hramadski paradak (č.1 art. 342 KK).
Na sudzie abvinavačany raspavioŭ, što ŭ toj dzień išoŭ u kinateatr «Maskva», ale na praśpiekcie ŭbačyŭ sčepku pratestoŭcaŭ. Jon padyšoŭ bližej i staŭ śviedkam taho, jak amapaviec zamachnuŭsia na dziaŭčynu. Jon padumaŭ, što toj choča stuknuć jaje pa hałavie dubinkaj. Tady Piatroŭski schapiŭsia adnoj rukoj za dubinku sa śpiny amapaŭca i paciahnuŭ jaje (u druhoj ruce Piatroŭskaha była butelka z vadoj). Zatym jaho zatrymali i adviali ŭ aŭtazak.
Pradstaŭnik dziaržabvinavačvańnia paprasiŭ sud prymianić pakarańnie ŭ vyhladzie troch hadoŭ abmiežavańnia voli biez nakiravańnia va ŭstanovu adkrytaha typu («chatniaja chimija»). Abaronca Piatroŭskaha paprasiŭ vynieści jamu minimalna mahčymaje pakarańnie.
13 maja sudździa Natalla Buhuk abviaściła prysud pavodle spravy: try hady abmiežavańnia voli biez nakiravańnia va ŭstanovu adkrytaha typu («chatniaja chimija»).